काठमाण्डु – नेपाल क्रिकेट संघ (क्यान) ले राष्ट्रिय टोलीका खेलाडी करण केसीलाई खेल भावना विपरीत व्यवहार गरेको भन्दै कारबाही गरेको छ ।

प्रधानमन्त्री कप १ दिवसीय राष्ट्रिय क्रिकेट प्रतियोगिता २०८२ अन्तर्गतका खेलहरूका क्रममा नेपाल पुलिस क्लबका खेलाडी केसीले सामाजिक सञ्जालमार्फत अम्पायरहरूप्रति आपत्तिजनक अभिव्यक्ति दिएको भन्दै संघले प्रतिबन्धको निर्णय लिएको हो ।

सामाजिक सञ्जालमा अम्पायरप्रति टिप्पणी गरेकाले कारबाहीको स्वरूप प्रधानमन्त्री कपको १ खेलमा प्रतिबन्ध लगाएको छ भने म्याच शुल्कको १०० प्रतिशत जरिवाना गरेको जारी विज्ञप्तिमा उल्लेख छ ।

केसीको अभिव्यक्ति खेल भावना अनुकूल नभएको र यसले क्रिकेटको गरिमामा आँच पुर्‍याएको संघको ठहर छ । नेपाल क्रिकेट संघका प्रवक्ता छुम्बी लामाद्वारा जारी प्रेस विज्ञप्तिमा सम्बन्धित सरोकारवालाहरूसँगको समन्वयपछि प्रतिबन्धको निर्णय गरिएको उल्लेख छ । खेलका क्रममा अनुशासन पालना गराउन र खेल भावना कायम राख्न यस्तो कदम चालिएको विज्ञप्तिमा जनाइएको छ ।