काठमाण्डु– गृहमन्त्री सुधन गुरुङले आफूहरु नयाँ भएकाले परिपक्वताको अभाव रहेको हुन सक्ने बताएका छन् ।

बिहीबार राष्ट्रियसभामा काँग्रेस सांसद् कमला पन्तद्वारा प्रस्तुत ‘मनसुनजन्य विपद् व्यवस्थापनमा सरकारको पूर्वतयारी’ सम्बन्धी ध्यानाकर्षण प्रस्तावमाथिको छलफलमा सांसदहरुले उठाएका प्रश्नको जवाफ दिने क्रममा उनले सिकेर परिपक्व हुने बताए ।

त्यसअघि गृहमन्त्री गुरुङले कञ्चनपुरकी निर्मला पन्तको बलात्कारपछि हत्याको विषयमा संसदमा विषय नउठाउन सांसदहरुलाई चेतावनी दिएका थिए ।

संसद् र सञ्जालमा विरोध भएपछि उनले माफी मागेका थिए ।

गुरुङले ठेस लागेपछि मात्र कति कुरा थाहा हुने भन्दै समयले आफूहरुलाई परिपक्व बनाउँदै लैजाने विश्वास व्यक्त गरे ।

पुराना दलका सांसदहरुले धेरै धक्का खाएपछि परिपक्वता आएको भन्दै उनले आफूहरुले पनि धक्का खाएपछि सिक्ने उल्लेख गरे ।

‘परिपक्वताको कुरा गर्नुभएको थियो माननीय सदस्यज्यूले, त्यो समयले विस्तारै बदल्ला कि ? हामी हजुरहरुभन्दा सानै छौं । बिस्तारै समयले परिपक्व बनाउँदै गर्छ । ठेस लागेपछि मात्र थाहा हुन्छ नि त कतिपय कुराहरु । समयले आफूलाई परिपक्व बनाउँछ होला’, उनले भने, ‘हजुरहरु पनि यहाँ धेरै धक्का खाएर आउनुभएको छ । त्यो धक्का हामीले पनि खाने इच्छा छ । हजुरहरुजस्तै परिपक्व भएर यही संसदमा जवाफ दिने इच्छा हामीलाई पनि छ । कतिपय शब्द नमिल्ला । तर, त्यसका लागि धेरै–धेरै माफी पनि माग्न चाहन्छु । विस्तारै शब्दहरु पनि मिल्ला, अनि परिपक्व हुनुभएको छ भनेर पनि भन्नुहोला यही सदनबाट ।’