काठमाण्डु– परराष्ट्रमन्त्री शिशिर खनालले त्रिशूली नदीमा आएको बाढीबाट भएको क्षतिको पुनर्स्थापना र पुनर्निर्माणका लागि अन्तर्राष्ट्रिय सहयोग आवश्यक पर्ने बताएका छन् ।

क्षतिको विस्तृत मूल्यांकनपछि आवश्यक परे दाता सम्मेलन आयोजना गर्न सकिने उनले संकेत गरेका छन् ।

शनिबार परराष्ट्र मन्त्रालयमा आयोजित प्रेस ब्रिफिङमा खनालले त्रिशूली बाढीका कारण सडक, पुल, जलविद्युत् आयोजना लगायतका पूर्वाधारमा ठूलो क्षति पुगेकाले अन्तर्राष्ट्रिय सहयोगको खाँचो पर्ने बताए ।

अहिले क्षतिको विस्तृत मूल्यांकन भइरहेको र त्यसपछि पुनर्निर्माणका लागि आवश्यक स्रोत तथा सहयोगको योजना तयार पारिने उनले जानकारी दिए ।

अहिले सरकारको प्राथमिकता उद्धार र राहतमा केन्द्रित रहेको उनको भनाइ थियो ।

त्रिशूली बाढीबाट प्रभावित समुदायलाई सहयोग गर्न छिमेकी मुलुकसहित विभिन्न देशबाट राहत सामग्री तथा अन्य मानवीय सहयोग प्राप्त भइरहेको जानकारी खनालले दिए ।

भारतबाट हालसम्म ५७ टनभन्दा बढी राहत सामग्री प्राप्त भइसकेको खनालले बताए । चीन, जापान, अष्ट्रेलियालगायतका मुलुकबाट पनि प्रभावितका लागि आवश्यक राहत सामग्री प्राप्त भइरहेको उनले उल्लेख गरे ।

बाढीपछिको उद्धार, राहत र अन्तर्राष्ट्रिय सहयोगका विषयमा विदेशी समकक्षीसँग आफूले प्रत्यक्ष संवाद गरिरहेको खनालले बताए ।

भारतीय विदेशमन्त्री एस. जयशंकरसँग कुराकानी भइसकेको र चिनियाँ विदेशमन्त्री वाङ यीसँग पनि संवाद गर्ने तयारी भइरहेको उनले जानकारी दिए ।

नेपालले विदेशी सहयोग अस्वीकार गरेको भन्ने समाचारप्रति पनि खनालले आपत्ति जनाए ।

नेपालले कुनै पनि आवश्यक अन्तर्राष्ट्रिय सहयोग अस्वीकार नगरेको र विपद्को सामना गर्न मित्रराष्ट्रबाट सहयोग लिइरहेको उनले स्पष्ट पारे ।

उनका अनुसार त्रिशूली बाढीबाट भएको क्षतिको मूल्यांकनपछि पुनर्निर्माणका लागि आवश्यक रकम र सहयोगको यकिन गरिनेछ ।

त्यसैका आधारमा अन्तर्राष्ट्रिय सहयोग परिचालन गर्ने तथा आवश्यक परे दाता सम्मेलन आयोजना गर्ने सरकारको तयारीमा सरकार रहेको जानकारी उनले दिए ।