काठमाडौं- सशस्त्र प्रहरी बलमा भर्ना हुन नक्कली शैक्षिक प्रमाणपत्र पेस गरेका इन्द्रबहादुर चन्दविरुद्ध भ्रष्टाचार मुद्दा दर्ता भएको छ।अख्तियार दुरुपयोग अनुसन्धान आयोगको अनुसन्धानमा चन्दले भर्ना प्रयोजनका लागि पेश गरेका शैक्षिक प्रमाणपत्र नक्कली भएको पुष्टि भएपछि बिहीबार मुद्दा दर्ता भएको हो।

आयोगका प्रवक्ता रामेश्वर दंगालका अनुसार चन्दले माध्यमिक शिक्षा परिषद्, उत्तरप्रदेश, भारतबाट प्राप्त गरेको इन्टरमिडियट तहको शैक्षिक योग्यताको प्रमाणपत्र नक्कली भएको पुष्टि भएको हो। उनका अनुसार चन्दलाई भ्रष्टाचार निवारण ऐन, २०५९ को दफा १६ को उपदफा १ अनुसारको कसुरमा सजाय मागदाबी गरिएको छ।

आयोगले मुद्दा दर्ता गरेसँगै चन्द स्वतः निलम्बनमा परेका छन। आयोगले सशस्त्रको भर्ना प्रक्रियामा अन्यले समेत नक्कली शैक्षिक प्रमाणपत्र पेस गरेको आशंकामा अनुसन्धान गरिरहेको छ। सशस्त्रले केही सयमअघि मात्र प्रहरी सहायक निरीक्षकको भर्ना लिएको थियो।