काठमाण्डु– अभिनेत्री रेखा थापा प्रहरी अधिकृतको भूमिकामा देखिने भएकी छन्। उनको अभिनय रहेको चलचित्र ‘३६ को आँकडा’को टिजर सार्वजनिक भएको छ।

टिजरमा प्रहरी अधिकृतको पोशाकमा देखिएकी रेखाको गम्भीर हाउभाउ र आत्मविश्वासपूर्ण प्रस्तुतिले दर्शकको ध्यान खिचेको छ। न्यायका पक्षमा दृढतापूर्वक उभिने प्रहरी अधिकृतको भूमिकामा उनको अभिनय देख्न सकिन्छ।

रेखा थापा र अभिनेत्री निरुता सिंहको सहकार्य रहेको चलचित्र ‘३६ को आँकडा’ रेखा फिल्मसको ब्यानरमा निर्माण भएको हो। चलचित्रले पारिवारिक सम्बन्धभित्रको मनमुटाव, असमझदारी र द्वन्द्वलाई मुख्य विषय बनाएको छ।

चलचित्रमा रेखा र निरुतासँगै पुष्प खड्का, महेश त्रिपाठीलगायत कलाकारको अभिनय रहेको छ। लामो समयदेखि नेपाली चलचित्र क्षेत्रमा सक्रिय रेखा र निरुतालाई एउटै पर्दामा देख्न पाउनु चलचित्रको अर्को आकर्षण हो।

पारिवारिक सम्बन्धमा आउने उतारचढाव र त्यसले निम्त्याउने द्वन्द्वलाई चलचित्रले कसरी प्रस्तुत गरेको छ भन्ने कौतूहल टिजर सार्वजनिक भएसँगै बढेको छ।

रेखा फिल्मसको निर्माण रहेको चलचित्र ‘३६ को आँकडा’ आगामी मंसिर १७ गतेदेखि प्रदर्शनमा आउनेछ।