चैत ५ मा स्थानीय निर्वाचन गराउन सरकार सकारात्मक, विपक्षी पनि तयार

चैत ५ मा स्थानीय निर्वाचन गराउन सरकार सकारात्मक, विपक्षी पनि तयार

मंसिरमा मिति टुङ्गो लगाउने तयारी

फन्ट परिवर्तन गर्नुहोस:

  • change font
  • change font
  • change font

काठमाण्डु- निर्वाचन आयोगले आगामी चैत ५ गतेभित्र स्थानीय तहको निर्वाचन गराउन सरकारलाई सुझाव दिएको छ। आयोगले राजनीतिक दलहरूसँगको परामर्श र आफ्नो तयारीका आधारमा चैत ५ गते निर्वाचन गराउन सकिने निष्कर्षसहित सरकारलाई मिति प्रस्ताव गरेको हो।

निर्वाचन आयोगका प्रवक्ता नारायण भट्टराईले दलहरूबाट प्राप्त सुझाव र आयोगको तयारीलाई विचार गर्दा आगामी चैत ५ गतेभित्र निर्वाचन गराउन कुनै समस्या छैन। आयोगले यसबारे सरकारलाई पनि जानकारी गराइसकेको छ। अब सरकारले उपयुक्त मिति घोषणा गर्ने प्रतिबद्धता जनाएको उनले जानकारी दिएका छन्।

‘हामीले सरकारलाई सुझाव दिइसकेका छौँ। चैतभित्र निर्वाचन गराउँदा कुनै समस्या हुँदैन। चैत ५ गतेसम्म अर्थात् ५ गते नै निर्वाचन गराउँदा पनि समस्या हुँदैन भन्ने कुरा गरिसकेका छौँ। सबै दलबाट प्राप्त सुझावका आधारमा नै हामी यो निष्कर्षमा पुगेका हौँ। सरकारले अब आवश्यक निर्णय गर्छ,’ भट्टराईले काठमाण्डुपाटीसँग भने।

सरकार पनि स्थानीय तहको निर्वाचन गराउने विषयमा सकारात्मक रहेको उनले बताए। ‘सरकार पनि यो विषयमा सकारात्मक देखिएको छ। आवश्यक निर्णय गर्छौँ, जानकारी गराउँछौँ भन्ने कुरा भएको छ,’ उनले भने।

सरकारसँग पनि निर्वाचनको विषयमा एक चरण छलफल भइसकेको छ। प्रधानमन्त्रीका सल्लाहकारहरूका अनुसार निर्वाचनको मिति घोषणा गर्ने तयारी भइरहेको छ। प्रधानमन्त्री भारत भ्रमणमा जानुअघि नै मिति घोषणा हुन सक्ने उनीहरूको भनाइ छ।

प्रधानमन्त्रीकी प्रेस संयोजक दीपा दाहालले पनि निर्वाचनको मिति टुङ्गो लाग्न बाँकी रहे पनि त्यसबारे छलफल भइरहेको बताइन्। ‘स्थानीय तह निर्वाचनको सन्दर्भमा कुराकानी भइराखेको छ। मितिको विषय फिक्स भएको छैन। चाँडै नै फिक्स हुन्छ,’ उनले भनिन्।

यसअघि २०७९ वैशाखमा स्थानीय तहको निर्वाचन भएको थियो। निर्वाचित जनप्रतिनिधिको कार्यकाल समाप्त हुनुअघि नै नयाँ निर्वाचन गराउनुपर्ने कानुनी व्यवस्थालाई ध्यानमा राख्दै आयोगले चैत ५ गतेलाई उपयुक्त मानेको हो।

रवि र प्रधानमन्त्रीले टुङ्ग्याउने

स्थानीय तह निर्वाचनको मिति घोषणाबारे प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच पनि छलफल हुने भएको छ।

छठ पर्व मनाउन अहिले मधेसमा रहेका लामिछाने सोमबार बेलुकासम्म काठमाडौं फर्किने कार्यसूची छ। उनी काठमाडौं फर्किएपछि प्रधानमन्त्री शाहसँग छलफल गरेर निर्वाचनको मितिबारे अन्तिम निर्णयमा पुग्ने तयारी छ।

लामिछानेले निर्वाचन आयोगसँग पनि यस विषयमा छलफल गर्न सक्ने उनको सचिवालयले जनाएको छ। ‘सभापतिज्यू काठमाडौं फर्किएपछि यस विषयमा कुराकानी हुन्छ। निर्णय चाँडै लिनुपर्छ भन्ने पक्षमा उहाँ पनि हुनुहुन्छ,’ लामिछानेको सचिवालयले भन्यो, ‘सरकार र निर्वाचन आयोग दुवैसँग छलफल भएपछि अन्तिम निर्णय हुन्छ। चैतमा तयारी पूरा नभएको अवस्थामा वैशाखमा हुन सक्छ। तर सम्भावना चैतभित्रै देख्छु।’

प्रधानमन्त्रीका सल्लाहकारहरू पनि रास्वपा सभापति लामिछाने काठमाडौं फर्किएपछि निर्वाचनको मितिबारे अन्तिम छलफल हुने बताउँछन्।

प्रधानमन्त्री भारत जानुअघि मिति घोषणा

स्थानीय तह निर्वाचनको मिति मंसिर महिनाभित्रै घोषणा गर्ने सरकारको तयारी छ। मंसिरको पहिलो सातामै बस्ने मन्त्रिपरिषद् बैठकबाट चैतमा निर्वाचन गर्ने मिति तोकिन सक्ने एक मन्त्रीले जानकारी दिए।

‘अहिलेसम्म निर्वाचनको विषयमा निर्णय भइसकेको छैन। मलाई लाग्छ, अब बस्ने मन्त्रिपरिषद् बैठकबाट वा प्रधानमन्त्री भारत जानुअघि यसबारे केही निर्णय आउला,’ मन्त्री विराजभक्त श्रेष्ठले काठमाण्डुपाटीसँग भने, ‘यो विषयमा सभापतिज्यू र प्रधानमन्त्रीज्यू उत्तिकै सचेत हुनुहुन्छ। त्यसकारण मंसिरमै निर्वाचनको मिति तोकिने सम्भावना देख्छु।’

सरकार चैतभित्रै निर्वाचन गराउन तयार रहेको पनि उनले बताए। निर्वाचन आयोगले आवश्यक तयारीका लागि पर्याप्त समय पुग्ने जानकारी गराएपछि सरकारलाई निर्वाचन गराउन कुनै समस्या नहुने उनको भनाइ छ।

‘निर्वाचन आयोगले तयारी गर्न समय पुग्छ भने सरकारलाई के समस्या हुन्छ र? तर गृहमन्त्रीज्यूले पनि आयोगसँग परामर्श गर्दा चैत वा वैशाखमध्ये कुन समयमा निर्वाचन गर्ने भन्ने टुङ्गो लगाइसक्नुभएको छैन। सरकार निर्वाचन पर धकेल्ने पक्षमा छैन,’ श्रेष्ठले भने।

गृहमन्त्री सुदन गुरुङले पनि यसअघि निर्वाचन आयोगसँग निर्वाचनको तयारी र सम्भावित मितिबारे छलफल गरिसकेका छन्। सरकारले चैत वा वैशाखमध्ये कुन मितिमा निर्वाचन गराउने भन्नेबारे अन्तिम निर्णय गर्न बाँकी छ।

विपक्षीको माग पनि चैतमै निर्वाचन

स्थानीय तहको निर्वाचन चैतभित्रै गराउनुपर्ने विषयमा विपक्षी दलहरू पनि एकमत देखिएका छन्। नेपाली कम्युनिस्ट पार्टी, नेपाली कांग्रेस र नेकपा एमालेले समेत आयोगलाई चैत महिनामै निर्वाचन गराउन सुझाव दिएका छन्। नेपाली कम्युनिस्ट पार्टीका सहसंयोजक माधवकुमार नेपालले चैतभित्रै निर्वाचन गराउनुपर्ने विषयमा आफ्नो पार्टी र आफू स्पष्ट रहेको बताए।

‘चैतभित्रै निर्वाचन गराउनुपर्छ भन्ने विषयमा हामी एकदमै एक ठाउँमा छौँ। हाम्रा साथीहरूले र व्यक्तिगत रूपमा मैले पनि आयोगलाई त्यही हिसाबले सुझाव दिइसकेको छु,’ नेपालले काठमाण्डुपाटीसँग भने, ‘सरकारले पनि आफ्नो हिसाबले तयारी गरेर चाँडै मिति तोकोस् भन्ने हाम्रो कुरा छ। निर्वाचनलाई पछि धकेलिरहने अवस्था सिर्जना हुनु हुँदैन भन्ने विषयमा हामी सचेत छौँ र सरकार पनि हुनुपर्छ।’

नेपाली कांग्रेसका सभापति गगनकुमार थापा र नेकपा एमालेले पनि चैत महिनामै निर्वाचन गराउँदा सहज हुने सुझाव दिएका छन्। हिमाली जिल्लामा समेत चैतमा निर्वाचन गराउन सकिने आयोग र राजनीतिक दलहरूको विश्लेषण छ। मौसम, भौगोलिक अवस्था र निर्वाचन व्यवस्थापनलाई ध्यानमा राख्दा चैत ५ गतेसम्म निर्वाचन सम्पन्न गर्न सकिने आयोगको निष्कर्ष छ।

यसरी निर्वाचन आयोग, सरकार र विपक्षी दलहरूबीच चैतभित्रै स्थानीय तहको निर्वाचन गराउने विषयमा समान धारणा देखिएको छ। अब मिति घोषणाका लागि मन्त्रिपरिषद्को औपचारिक निर्णय मात्र बाँकी छ।