उर्जामन्त्री पुन र एडिबीका प्रतिनिधीबीच भेट, उर्जा क्षेत्रमा सहकार्य गर्नेबारे छलफल
काठमाडौं– उर्जा,जलस्रोत तथा सिंचाईमन्त्री बर्षमान पुन र एसियाली विकास बैंक(एडिबी)का आवासीय प्रतिनिधी मुखतोर खामुडखानोभबीच भेटवार्ता भएको छ । सिंहदरबारस्थित उर्जामन्त्रालयमा भएको भेटवार्तामा उर्जा क्षेत्रमा एशियाली विकास बैंकको सहयोगमा संचालित आयोजनाहरुको प्रगती र आगामी दिनमा गर्ने सहकार्यबारे छलफल भएको थियो ।
भेटमा मन्त्री पुनले नेपालको विकासमा एडिबीले गरेको सहयोगप्रती धन्यवाद व्यक्त गरेका थिए । उनले आगामी दिनमा समेत सरकारलाई एडिबीको सहयोग निरन्तर हुने विश्वास व्यक्त गरे । मन्त्री पुनले तनहु जलविद्युत परियोजना र भुमिगत केवलिङ परियोजना सरकारको प्राथमिकतामा रहेको भन्दै आगामी दिनमा पनि थप सहयोगको अपेक्षा रहेको बताए ।
भेटमा मन्त्री पुनले दुधकोशी जलविद्युत आयोजना छिट्टै अगाडी बढाउने गरी काम सुरु भइसकेको जानकारी समेत दिए । दुधकोशी परियोजनामा टिबीएमको प्रयोग गरेर भएपनि काम दु्रत गतिमा अघि बढाउने मन्त्रालयको सोच रहेको मन्त्री पुनको भनाई थियो ।
मन्त्री पुनले उर्जा र जलस्रोत क्षेत्रको समग्र विकासको लागी आफुले मार्गचित्र सार्वजनिक गरेको भन्दै आगामी दिनमा जग्गा,वन र वातावरणको समस्या हल हुनुका साथै परियोजना कार्यान्वयनमा कुनै समस्या नहुने दाबी गरे ।
भेटमा एडिबीका आवासीय प्रतिनिधी खामुडखानाले एशियाली विकास बैंकको सहयोगमा संचालित आयोजनाहरुको प्रगतीको बारेमा जानकारी मन्त्री पुनलाई गराउनुभएको थियो । भेटमा उहाले उर्जा क्षेत्रमा थप सहयोग गर्न एडिबी तयार रहेको धारणा राख्नुभएको थियो ।
‘मन्त्रालय र हाम्रोबीचमा सम्बन्ध राम्रो छ, उर्जा क्षेत्र हाम्रो पनि प्राथमकितामा भएकाले आगामी दिनमा समेत हाम्रो सहकार्य अझ सुमधुर हुन्छ ।’ आवासीय प्रतिनिधी खामुडखानाले भेटमा भन्नुभयो ।
उहाले वाग्मती सिंचाई परियोजनामा एडिबीले ५० मिलियन सहयोग गरिसकेको जानकारी दिंदै बाग्मती ड्याम निर्माणमा समेत सहयोग गर्ने प्रतिवद्धता समेत व्यक्त गर्नुभयो ।
