अन्तर्वार्ता ब्रेकिंग न्युज

म एकता विरोधी भैदिएको भए त्यही भाँडदिन सक्थें होला : वर्षमान पुन‘अनन्त’

‘म यो जिम्मेवारीमा आँउदा मरिहत्ते गरेर मलाई यही चाहिन्छ भनेर आएको होइन,सरकारको डिलडरशीपलाई सघाउछु भनेर आएको हो’

एक युवा नेताका हैसियतमा भर्खरै दुई कम्युनिष्ट पार्टीबीच भएको ऐतिहासिक एकतालाई कुन रुपमा लिनुभएको छ ?
– नेपाली कम्युनिष्ट आन्दोलनको ७० वर्षको इतिहासमा कमरेड पुष्पलालको नेतृत्वमा नेपालमा जनवादी क्रान्ति गर्ने गरी त्यो लक्ष्यका साथ कम्युनिष्ट पार्टी स्थापना गर्नुभयो । त्यो राजनीतिक क्रान्तिको चरण पुरा भयो । अब हामी समाजवादी क्रान्तीको चरणमा प्रवेश गरेका छौं । र, ७० वर्षको इतिहासमा नयाँ चरणको क्रान्तिका लागि ५० औं वर्ष देखि अलग अलग रहेका पार्टीहरु एक भए । यो ऐतिहासिक आवश्यकता थियो । यसका लागि कमरेड केपी ओली र कमरेड प्रचण्ड लगायतका शिर्ष नेतृत्वले इतिहास बदल्ने आँट गर्नुभयो । यो सबैभन्दा ठुलो निर्णय हो । यो नेपालको इतिहास र विश्व कम्युनिष्ट आन्दोलनमा पनि धेरै पछिसम्म अध्ययन गर्ने दुरगामी महत्वको परिघटना भएको छ ।

dish home

संयुक्त चुनावी घोषणपत्र अनुसार समृद्ध र सुखी नेपाल निर्माणका लागि मन्त्रालयमा रहेर के के काम गर्दै हुनुहुन्छ ?
-एकता अघि गठवन्धन गरे हामी दुइवटै पाटी एउटै घोषणा पत्र लिएर चुनावमा गयौं । त्यसले जनतामा विश्वास पैदा भयो र जनमत प्राप्त गरेका छौं । र हामीले शुसाशन कायम गछौं, प्रशासनमा भएका वेथिति, अराजकता, घूसखोरी भ्रष्ट्राचार, सिन्डीकेट, कार्टेलिङ जस्ता कुराहरुलाई अन्त्य गर्दै शुसाशन कायम गर्छौ, जसको जगमा विकास गर्छौ, विकासबाट आम नेपाली जनताको समृद्धि हासिल गर्छौ । र, नेपाली जनतालाई सुखी बनाउँछौं भनेका छौं । र, यो अहिलेको हाम्रो दायित्व हो । वर्तमान सरकारले यो कामको लागि प्रयत्न गर्छ ।

अहिलेको नेतृत्वले यसमा अवरदारी गर्छ । पाँच वर्षमा आजको आयस्तरलाई हामी दोब्बर बनाउँछौं । कृषि उत्पादन पनि दोव्वर बनाउँछौं । जलश्रोत क्षेत्रमा हामी ५ हजार मेगावाट थप उत्पादन पु¥याउँर्छौ भनेका छौं, त्यो लक्ष्य हामी पुरा गर्छौ । आर्थिक क्षेत्रमा, सामाजिक रुपान्तरणको क्षेत्रमा र पुर्वाधार निर्माणको क्षेत्रमा हामी त्यो उपलव्धी हासिल गर्छौ । लक्ष्य हासील गर्छौ । यो हाम्रो प्रतिवद्धता र आत्मविश्वास हो ।

जलश्रोत र उर्जा क्षेत्रमा आत्मनिर्भर हुँदै झोलामा खोला ओगट्ने र उर्जा माफियाहरुको अनावश्यक स्वार्थ र चलखेल रोक्ने सवालमा चाँही के योजना छ ?
-यसभन्दा अगाडिको सरकारले सर्वसाधारण जनताले प्रयोग गर्ने विद्युतमा लोडसेडीङ मुक्त गरेको थियो । करिव ४ घण्टाको औद्योगिक क्षेत्रको लोडसेडिङको अवस्था थियो । वर्तमान सरकार आइसकेपछि र म यो मन्त्रालयमा आइसकेपछि वैशाख मसान्तभित्र हटाउने गरी कार्ययोजना बनाएर काम सुरु गरेको थिँए, त्यो लक्ष्य पुरा भएको छ । अब मुलुक लोडसेडिङमुक्त भएको छ औद्योगिक क्षेत्र समेत । अब लोडसेडिङ नेपालमा इतिहास मात्र भएको छ ।

यस क्रममा अहिले हामी आधा जसो अर्थात साढे चारसय देखि ५ सय मेगावाट हिँउदमा हाम्रो आफ्नै उत्पादन छ भने त्यती नै मात्रामा हामीले भारतबाट आयात गरिरहेका छौं । यसरी हामीले अहिलेको माग पुरा गरिरहेका छौं । आगामी २ देखि ३ वर्षभित्र हामीले विना आयात हिँउदमा पनि हामी विद्युतमा आत्मनिर्भर हुन्छौं । आगामी वर्षदेखि हामी पाइपलाइनमा भएका आयोजनाहरुलाई तदारुकता गछौं । र हामी जसरी पनि ल्याउने व्यवस्था गछौं । जसबाट वर्खामा आत्मनिर्भर भइसक्छौं र केही विद्युुत हामी विक्री पनि गछौं । यसरी विद्युतीय उर्जा क्षेत्रमा हामी आत्मनिर्भर हुन्छौं ।

झोलामा खोला ओगट्नेहरुलाई नी ?
-यो क्षेत्रमा अहिले झोलामा खोला राख्ने प्रवृति छ । लाइसेन्स लिन्छ, बोकेर हिड्छ, विक्री गर्दै हिँड्छ, काम गर्दैन । यस्ता प्रकारका विचौलियाहरुको बिगबिगी छ । यसैले हामीले सर्वेक्ष्ण लाइसेन्स लिएको छ, तालिका अनुसार काम गरेको छैन, हामी खारेज गरिदिन्छौं । उत्पादन लाइसेन्स लिएको छ, काम तालिका अनुसार गरेको छैन भने हामी खारेज गरिदिन्छौं । पिपिए अर्थात विद्युत खरिद सम्झौता गरेको छ, त्यो अनुसार उत्पादनमा गएको छैन भने हामी त्यस्तोमा पनि खारेज गरिदिन्छौं । र, वास्तविक लगानीकर्ता र वास्तविक आयोजना गर्नेहरुलाई हामी लाइसेन्स र अवसर दिन्छौं ।

चुहावट नियन्त्रण कसरी गर्दै हुनुहुन्छ ?
-अहिले पनि विद्युतमा चुहावट छ । कतिपय प्राविधीक चुहावट छ भने कतिपय स्थानमा मिलेमतोमा पनि चुहावट छ । हुकिङ गरेर विद्युत चोरी गर्ने लगायतका समस्या नभएको होइन । त्यसलाई हामीले २६ प्रतिशतबाट २० प्रतिशतमा ल्याएका छौं । अब हामी २० बाट १५ प्रतिशतमा यसको चुहावटलाई ल्याँउछौं । हरेक क्षेत्रमा देखिएको चुहावट नियन्त्रण गर्ने गरी हामी एउटा प्रभावकारी कार्ययोजना ल्याँउदैछौं ।

ठुला आयोजनाहरुको विकास गर्ने योजना कसरी पुरा गर्दै हुनुहुन्छ ?
-आफुखुसी आयोजनाहरु विकास गर्नेहरुलाई नदी वेसनमा दिएर कति आयोजनाहरु क्यासकेट पनि हुन सक्छन् । अर्थात माथिल्ला आयोजना बनिसकेपछि तल्ला आयोजना विना ड्याम पनि क्यासकेटको रुपमा कम खर्चमा आकर्षक ढंगले बन्न सक्छ । त्यसैले हामी नदी जलाधार क्षेत्रलाई नै योजनावद्ध विकास गर्न लागिरहेका छौं । यो क्रममा हामी निजी क्षेत्रलाई पनि र सरकारी क्षेत्रलाई पनि प्रोत्साहीत गर्ने गरी हामी काम गर्दैछौं । अहिले आयोजना आउने तर ट्रान्समीसन लाइन नबन्ने चिन्ताहरु छन्, त्यसलाई हामी हल गर्छौ । स्थानीय जनताको अवरोधलाई हामी ट्रान्समीसन लाइन जहाँबाट जान्छ त्यो लाइन मुनीको जग्गा लिजमा लिने, नियमित भाडाको व्यवस्था गर्छौ ।

त्यसैगरी ट्रान्समीसन लाइन प्रभावित जग्गावाललाई हामी उपयुक्त विद्युत आयोजनामा लगानीको अवसर दिन्छौं । त्यसो गर्न यो क्षेत्रमा जनताको सहभागिता र सहजिकरण गर्ने सोच बनाएका छौं । त्यसैगरी निजी क्षेत्र वा विभिन्न उत्पादकहरुले भोगीरहेका समस्याहरुलाई हामी अन्तक्रिया गरेर सहजिकरण गर्ने तर आयोजनाहरु छिटो ल्याउने गरी हामी व्यवस्था गर्छौ । तर ठुला आयोजनाहरुको हकमा बहुउद्धेश्यीय आयोजनाहरु, रिजर्भभायरको हकमा विदेशी लगानीकर्ता भित्र्याउने वा सरकार आफैंले बनाउँदा विदेशी श्रृण र सहायता जुटाउनेमा हाम्रो प्राथमिकता रहेको छ ।

सरकारले सय दिन पुरा गरिसक्दा पनि सिन्डीकेट हटाउने बाहेक अरु केही काम भएन भन्ने जनताको गुनासो छ नी ?
-मेरो आफ्नो त जम्मा २ महिना नाघेको मात्र छ । प्रधानमन्त्रीज्युले सपथ ग्रहण गर्नुभएको मात्र सय दिन पुरा भएको हो । यस बीचमा सिन्डीकेट अन्त्य गर्ने, अरु क्षेत्रका कार्टैलिङ, सिन्डीकेट र बिचैलीया प्रवृतीलाई अन्त्य गर्नेगरी सरकारले काम गरिरहेको छ । यो मन्त्रालयको हकमा पनि समग्र अवस्था बुझेर श्वेतपत्र जारी गरीसकेका छौं । यो क्षेत्रमा आगामी पाँच वर्ष वा १० वर्षका लागि हामीले कसरी काम गर्छौ भनेर नीतिगत रुपमा हामीले दिशा निर्देश गरेका छौं ।

साथै हामीले चार घण्टासम्मको औद्योगिक क्षेत्रको लोडसेडीङलाई लोड म्यानेज गरेका छौं । केही नया आयोजना आएर, केही नयाँ खरिद गरेर, केही आयोजनामा सुधार गरेर, केही चुहावट नियन्त्रण गरेर हामी त्यो अवस्थामा आइपुग्न सफल भएका हौं । यो प्रगती नै हो । त्यसैगरी यहीबीचमा हामी करिव १७ सय मेगावाट बराबरको उत्पादन लाइसेन्स दिएका छौं । त्यही हाराहारीमा पिपिए भएको छ । लगभग त्यही हाराहारीको नयाँ सर्वे लाइसेन्स पनि जारी गरेका छौं । हामी छिटोभन्दा छिटो अर्थात यो २ महिना भित्रमै काम कसरी हुन्छ भनेर योजनावद्ध ढंगले लागेका छौं । त्यसैगरी मेरो आफ्नो मन्त्रालय सिँचाई पनि हो । वैकल्पिक उर्जा पनि हो । त्यो क्षेत्रमा पनि यो मन्त्रालयको कामहरु छ ।

भेरीबबई डाइभर्सनको कुरा गर्नुहुन्छ भने टनेल बोरीङ मेसीनबाट १३ किलोमिटरको सुरुङ झण्डै आधा खनीसकेको छ । त्यो रफ्तारमा कामहरु भइरहेको छ । अरु सिञ्चाई क्षेत्रका आयोजनाहरु पनि समयमै काम गर्नेगरी कामहरु भइरहेका छन् । अरु कामहरु पनि आफ्नै गतीमा भइरहेका छन् । तत्कालै परिणममा बताउने गरी काम नभएको देखिएपनि छिट्टै परिणामहरु आउनेछ ।

हामीले आयोजनाहरु समयमै सम्पन्न गर्नेगरी अनुगमन गर्ने र सरकारको लगानी रहेका वा अन्य निजी कम्पनीहरुले निर्माण गरिरहेको विद्युत आयोजनाहरु समयमै सम्पन्न गर्न नियमित अनुगमन, नियमित निर्देशन दिइरहेका छौं । आगामी ३ वर्षमा ३ हजार मेगावाट आयोजना आउने तयारी अवस्थामा रहेका छन् । आगामी पाँच बर्षमा पाँच हजार मेगावाट आउने ग्यारेन्टीका साथ हामीले श्वेतपत्रमा तालिका नै दिएका छौं ।

आयोजनाहरु समयमै सम्पन्न हुनु पनि शासकीय सुधारको कुरा हो । त्यसैगरी २५ मेगावाटको एक वर्षभित्रै आउनेगरी सोलार प्लान्ट सुरु गरिसकेका छौं । छिट्टै अर्को २५ मेगावाटको सोलार प्लान्ट सुरु गर्दैछौं । त्यसैगरी वैदेशिक लगानीको कुरामा पनि केही कम्पनीहरु सोलारको क्षेत्रमा, जलविद्युतको क्षेत्रमा, ट्रान्समिशनको क्षेत्रमा लगानी गर्नेगरी आएका छन् । त्यसलाई हामी सहजीकरण गरिरहेका छौं । त्यसैले कामहरु उत्साहजनक ढंगले गरिरहेका छौं ।

अहिले सरकारका मन्त्रीहरु कामभन्दा पनि हल्लाखल्ला बढी गर्ने र मिडीया सेलीब्रेटी बन्ने होडमा मात्र लागेका छन् भन्ने गुनासो छ नी ?
-सुरुका दिनमा स्वभाविक रुपमा मन्त्रीले आफ्नो प्राथमिकता बताउने नै हो । आफ्नो भिजन दिने कुरा हो । कार्ययोजना बनाउने हो । पाँच वर्षको सरकारले सुरुकै दिन त केवल आफ्ना प्राथमिकताहरु निश्चीत गर्ने मात्र न हो । पुर्न प्राथमिकीकरण गर्ने हो । नीतिहरु निर्माण गर्ने हो । आफ्ना दृष्टिकोणहरु बताउने हो । त्यसैले अलिकति प्रचार त गर्नैप¥यो । पहिलो चरणमा जहाँपनि प्रचारात्मक काम नै हुन्छ । दोस्रो चरणमा त्यो अनुसारको फिडव्याक बुझेर सुधार र एक्सनहरुमा जानुपर्छ ।

त्यसैले त्यो अन्यथा होइन । फेरी अर्को ढंगले हेर्दा नयाँ मन्त्री आएपछि स्वभाविक ढंगले मिडीयाको चासो हुन्छ । सबै पछि लाग्छ । सबैले कुरा जान्न खोज्छ । र, यसलाइृ अन्यथा मान्नु पनि हुँदैन । अर्कोतिर परिणाम त सय दिनमा के नै हुन्छ र ? सय दिनमा नीति बनाउँछ, त्यहाँका संरचना बुझ्छ, संरचना बनाउँछ अनि सय दिन पछि मात्र काम सुरु गर्छ भन्ने हो । यसैले त हनिमुन पिरियड भनेको । सय दिनमा खासमा एक्सन होइन तयारीको अवधी हो । त्यसैले तयारीको समयमा रिजल्ट खोजिँदैन ।

संसदीय व्यवस्थामा विपक्षीले पनि तयारीकै लागि सय दिनसम्म छुट दिन्छ । सय दिनमा के गरिस् भनेर सोध्न पनि नैतिक रुपले मिल्दैन । एक सय एक दिनदेखि मात्र रिजल्ट खोज्न सुरु गर्ने हो । हामी सय दिनपछि होइन भएको भोलीपल्टै देखि रिजल्ट खोज्न सुरु गछौं तैपनि अहिलेको सरकारले छिमेकसंगको सम्वन्धको कुरा, वैदेशिक लगानी जुटाउने कुरा, वैदेशिक लगानी र आन्तरिक लगानीका लागि लगानीमैत्री वातावरण बनाउने कुरा होस, त्यस्तै उल्लेख्य केही शासकीय सुधारका कुरा होस्, यि तमाम कामहरु सुरु गरेको छ । यो सकारात्मक रुपले र उत्साहजनक ढंगले नै अगाडी बढेको हामीले पाएका छौं ।

एमाले र माओवादी ठ्याक्कै दुइ ध्रुवमा विभाजित पार्टी कसरी अप्रत्यासीत ढंगले एकता संभव हुन गयो ?
-दुइजना अध्यक्ष कमरेड केपी ओली र कमरेड प्रचण्डको स्वभाव अलि विपरीत खालको छ, सोच्ने तरिका अलि विपरीत खालको छ भन्ने गरिन्थ्योे विगतमा । तर तथ्यहरुले के पुष्टी ग¥यो भने सोचहरु एउटै दिशातिर रहेछन् । एउटा बैठकको क्रममा कमरेड केपी ओलीले के भन्नुभयो भने हामी एकै दिशातिर दगुरीराखेका थियौं, क्रान्ति, परिवर्तन, जनताको सेवा, देशको सेवा भनेर ।

दर्गुदा दगुर्दा कहिलेकाँही नजिक भइयो टच हुँदा ठुलो घर्षण पैदा भयो । दुइवटा वस्तुहरु तिव्र गतिमा हिँडीराखेको बेला टच गर्दा झिल्का निस्कीएजस्तै हिजो माओवादी र एमालेका बीचमा एकैदिशातिर दगुरीराख्दा कहिलेकाँही यस्सो जुझ्न जाँदा झिल्का निस्कीएको हो भन्नुहुन्थ्यो । त्यसै भएको भनेर तथ्यहरुले पुष्टी गरेका छन् । प्रचण्ड र केपी ओलीले सोच्ने तरीकाका साथै हिँड्ने बाटो एउटै रहेछ, त्यसैले त सोचहरु मिल्दै आयो । अनि एकतासम्म आयो ।

तर राजनीतिक बजारमा नीति र सिद्धान्तको मन्थन नभई प्राविधीक रुपमा भएको एकता भएकाले यो लामो टिक्दैन भन्ने आशंका छ नी ?
-यो टिक्छ भन्ने तथ्यहरुले देखाएको छ । किनभने हामीले पहिले जनताको तहबाट एकता सुरु ग¥यौं । निर्वाचनमा जाने एजेण्डाहरु तय ग¥यौं । त्यो एजेण्डामा जनतालाई अपिल ग¥यौं । जनतालाई हामीले भन्यौ की भोली हामी एकता पनि गछौं । जनताले त्यो हाम्रो सोचलाई झण्डै दुइतिहाई जनताले एकदम ठिक छ भनेर संगै जान दिशावोध गरे । जनताको त्यो जनमतपछि नेताकार्यकर्ता संगै पहिले सहकार्यबाट परिक्षण गरेर त्यसलाई वैचारिक कसीमा जाँचेर संगठनात्मक एकता र नेतृत्वको व्यवस्थापन गरिएको हो । त्यसैले यो दिगो हुन्छ ।

कहिलेकाही नेताहरु मिलाउने, विचार मिल्ने तर कार्यकर्ता र जनता नमिल्ने हुन्छ । त्यो व्यवहारिक पनि हुँदैन । तर यहाँ जनताकै तहबाट अन्तरक्रिया गर्दै, कार्यकर्ताहरु संगै एउटै मोर्चामा खट्दै जनताले समेत अनुमोदन गरेर एकता भएको हो । त्यसैले यो ६–७ महिनाको सहकार्य र अन्तरक्रियाबाट र लाखौं लाख जनताको सहभागिता र अनुमोदनबाट भएको हुनाले यो एकता दिगो हुन्छ भन्ने घटनाक्रमहरुले देखाएको छ । बरु दुइजना या चारजना नेता बसेर गरेको भए त्यो समझौता जस्तो हुन्थ्यो होला । लेनदेन जस्तो हुन्थ्यो होला । यो त जनतामा गएर परिक्षण गरेर गरिएको एकता हो नी त ।

यो समग्र एकता प्रक्रियामा पनि तपाँइलाई एकताविरोधीका रुपमा चित्रित गरियो, यसमा के भन्नुहुन्छ ?
-हो, स्वभाविक हो । राजनीतिमा यस्ता आरोप सामान्य हुन् । पार्टीभित्र पनि छलफल हुन्छ । बहश हुन्छ । कामहरुका जस कसले लिने भन्ने मान्छेका स्वभाविक मानवीय स्वभाव हुन्छन् । म के हुने भन्ने त मेरो संगत कोसंग छ भन्ने कुराले निर्धारण गरिहाल्छ नी । लेनीनले एउटा सन्दर्भमा मान्छे के हो भनेर तर्क गर्ने होइन, कोसंग संगत गरेको छ, उसको संगतबाट उ के हो थाहा हुन्छ भन्नुभएको छ । नेताहरुले निर्वाचनको बेला मलाई निर्वाचन क्षेत्र बाँडफाटको काम दिनुभयो । हामीले स्मुथ्ली मुख्य नेताहरु कहाँ पनि विवाद नपुग्ने गरी लगभग ९९ प्रतिशत निर्विवाद ढंगले हल ग¥यौ । म एकता विरोधी भैदिएको भए त्यही भाँडदिन सक्थें होला ।

त्यसपछि बेदुराम भुषालजी र म मिलेर विधान लेखनको काम ग¥यौ. । हामीले गरेका ड्राफ्ट नै कार्यदलमा पास भयो । त्यही नै शिर्ष तहमा पास भयो । भन्दा त एकता नचाहने मान्छेले विधान सर्वसम्मत पास हुने, एकता नचाहने मान्छेले बनाएको निर्वाचन क्षेत्र वाँडफाँटमा सबै जितिने अनि म चाँही एकता विरोधीका रुपमा चित्रित हुनुपर्ने ? त्यसैले यो कुरालाई मैले अन्यथा रुपमा लिँदिन । काम गर्ने मान्छेहरुको बारेमा टिप्पणी उठ्छन् । मान्छेका कमी पनि हुनछन् । मान्छेलाई कमी सहितका र समस्या सहितका रुपमा बुझ्नुपर्ने हुन्छ । त्यस अर्थमा पार्टीभित्र सहज रुपमा गरेका कामहरु जस लिने होडहरु हुन्छन् । त्यसकारण त्यो आरोपलाई मैले अन्यथा रुपले लिएको छैन ।

अहिले प्रधानमन्त्रीसंग मतभेद भएर बर्खास्तीको तयारी हुँदैछ भन्ने हल्ला छ नी ?
यि सबै अनैतिक र सोह्रै आना कपोलकल्पित कुरा हुन् । म यो जिम्मेवारीमा आँउदा मरिहत्ते गरेर मलाई यही चाहिन्छ भनेर आएको पनि होइन । मैले त हिजो अर्थ मन्त्रालय सम्मको जिम्मेवारी लिइसकेको हो । लिडरहरुले भनेपछि अहिलेको परिस्थितीमा पार्टी लिडरशीप र सरकारको डिलडरशीपलाई सघाउछु भनेर आएको हो । यसो हुँदा यसमा दुइजना अध्यक्षले काही समस्या देखाएको या प्रधानमन्त्रीले समस्या देखाएको अहिलेसम्म मलाई जानकारी छैन । तर नचाहिने र अनर्गल प्रचार गर्ने गरिएको छ । चरित्र हत्या गर्ने गरिएको छ । यो सोह्रै आना झुट कुरा हो ।
बुधवार साप्ताहिकबाट

Comments

comments

Now Get KathmanduPati App on your mobiles.

Android App iOS App
ad

धेरै पढिएको समाचार

Vianet
NEA
Yeti Airlines
Kumari Bank
Shikhar Insurance
Muktinath Development Bank
Nepal Vidhyapith

Now get KathmanduPati App on your mobiles.

Android App iOS App
Scroll to Top