बाबुराम भट्टराईको नयां पार्टीमा हिसिला यमी उपाध्यक्ष, ज्वांई र छोरी केन्द्रीय सदस्य
काठमाण्डु – पूर्व प्रधानमन्त्री बाबुराम भट्टराईले नेपाल समाजवादी पार्टी गठन गरेका छन् । भट्टराईले आफु पहिलो नम्बरमा र महेन्द्र राय यादवलाई दोस्रो अध्यक्ष बनाउंदै पार्टी गठन गरेका हुन् । उनको पार्टीको सहअध्यक्ष उनि प्रधानमन्त्री हुंदाका प्रमुख स्वकिय सचिव गंगानारायण श्रेष्ठलाई बनाएका छन् । श्रेष्ठ माओवादी जनयुद्धमा लामो समय होमिएका सिन्धुलिका नेता हुन् ।
नेपाल समाजवादी पार्टीको केन्द्रीय समिति भने १ सय ८९ सदस्यीय छ । पार्टीमा तीन उपाध्यक्ष बनाइएको छ । जसमा पहिलो नम्बरमा भट्टराई पत्नी हिसिला यमि समेत छिन् । उपाध्यक्षमा जाजरकोट घर भएका नेता भक्त बहादुर शाह र दुर्गा सोव र महासचिव रमेशप्रसाद यादवलाई बनाइएको छ ।
जनता समाजवादी पार्टी (जसपा) विभाजन भएपछी भट्टराईले नयां पार्टी गठन गरेका हुन् । कुनै बेला माओवादी जनयुद्धको नेतृत्व गरेका र पार्टीको दोस्रो स्थानमा रहेका भट्टराई प्रधानमन्त्री समेत भएका थिए । त्यसपछी उनले नयां शक्ति नामक पार्टी गठन गरेका थिए ।
माओवादी जनयुद्धलाई शान्तिपूर्ण रुपान्तरण गर्नमा महत्वपूर्ण भूमिका खेलेका भट्टराई पछिल्लो समय राजनीतिमा असफल सावित भएका छन् । भट्टराई संविधान जारी भएपछी माओवादीबाट अलग भएका थिए । भारतको चर्को असन्तुष्टिका बावजूत नेपालमा संविधान जारी भएपछी भट्टराईले नयां शक्ति गठन गरेर जान खोजेपनि उनको मिसन भने सफल भएन ।
अर्थमन्त्री हुंदा राम्रो काम गरेर प्रशंसा कमाएका भट्टराई प्रधानमन्त्री हुंदा भने आलोचित भएका थिए । पछिल्लो समय मधेश र पहाडलाई जोड्ने भन्दै जनता समाजवादी पार्टी बनाएका भट्टराईको उपेन्द्र यादवसंगको मतभेद भएपछि उनि अलग भएका छन् ।
दीपक लामिछाने अध्यक्ष रहेको पार्टी उनले भट्टराईलाई हस्तान्तरण गरेका हुन् । भट्टराईले केन्द्रीय समितिमा छोरी मानुषी यमि भट्टराईलाई दश नम्बरमा र ज्वांई जेकेन्द्र श्रेष्ठलाई ४१ नम्बरमा राखेका छन् ।
मानुषी र जेकेन्द्रले अखिल क्रान्तिकारीमा समेत केन्द्रीय समितिमै रहेर राजनीतिक गरेका थिए । जवाहरलाल विश्वविद्यालयमा अध्ययन गरेकी मानुषी त्रिभुवन विश्वविद्यालयको स्ववियु सभापति समेत बनेकी थिईन ।
भट्टराई पत्नी हिसिला देशको मन्त्री र सांसद बनेकी थिईन । उनि माओवादीमा हुंदा नेवा राज्यको प्रमुख समेत बनिन् ।
