काठमाण्डु– नेपाल प्रिमियर लिग (एनपीएल)को फाइनल खेलको टिकट खरिद गर्न एकैपटक करिब २ लाख प्रयोगकर्ताले प्रयास गरेको नेपाल क्रिकेट संघ (क्यान) ले जनाएको छ ।
फाइनल खेलको टिकट बिक्री खुला भएको केहीबेरमै बुक भएपछि टिकट नपाएका समर्थकहरूले आयोजक नेपाल क्रिकेट संघ (क्यान) विरुद्ध नाराबाजी गरेका थिए ।
लगत्तै क्यानले विज्ञपति जारी गर्दै शनिबार हुने लुम्बिनी लायन्स र सुदूरपश्चिम रोयल्सबीचको फाइनल खेलको टिकट बिक्री खुला गरेलगत्तै ठूलो संख्यामा समर्थकले खरिद गर्न खोजेको जनाएको हो । तर, त्रिवि क्रिकेट मैदानको सीमित क्षमताका कारण बिक्री खुला भएको केही मिनेटमै सबै टिकट बिक्री भएका हुन् ।
टिकट खरिद गर्न नपाएका समर्थकलाई क्यानले अनलाइन तथा आधिकारिक प्लेटफर्ममार्फत खेल हेरेर प्रतियोगितालाई समर्थन गर्न आग्रह गरेको छ ।
‘नेपाल प्रिमियर लिगको यही मिति २०८३ मङ्सिर ५ गते हुने फाइनल खेलको टिकट बिक्री खुला गरिएको समयमा करिब २ लाख प्रयोगकर्ताहरूले एकैसाथ टिकट खरिद गर्न खोज्नुभएको तर क्रिकेट मैदानको क्षमताअनुसार टिकटको उपलब्धता सीमित भएका कारण बिक्री खुला भएको केही मिनेटमै सम्पूर्ण टिकटहरू सोल्डआउट भएको जानकारी गराउँदछौँ।’ क्यानले भनेकाे छ ।
एनपीएलको फाइनलमा गत सिजनका दुई फाइनलिस्ट लुम्बिनी लायन्स र सुदूरपश्चिम रोयल्स उपाधिका लागि आमनेसामने हुँदैछन् ।




प्रतिक्रिया