भारतीय क्षेत्रमा चिनियाँ सैनिक प्रवेश, स्थानियको विरोधपछि फिर्ता
काठमाण्डु– भारतीय क्षेत्रमा चिनियाँ सैनिक दुईवटा गाडी मार्फत प्रवेश गरेका छन् । भारत–चीन सीमाको लेह क्षेत्रबाट १३५ किलोमिटर पूर्वमा रहेको न्योमा क्षेत्रको चानताङ गाउँमा चिनियाँ सैनिक प्रवेश गरेको दाबीसहितको खबर भारतीय सञ्चारमाध्यमहरुले प्रकाशित गरेका छन् ।
स्थानीय बासिन्दाले आइतबार चिनियाँ सैनिक भारतीय क्षेत्रमा प्रवेश गरेको भिडियो सामाजिक सञ्जालमा सेयर गरेका थिए । दुई गाडीमा रहेका चिनियाँ सैनिकको एक समूह भारतीय क्षेत्रमा प्रवेश गरेको टाइम्स अफ इन्डियाले उल्लेख गरेको छ ।
चिनियाँ सैनिकहरु सादा पोशाकमा रहेको र उनीहरुले स्थानीय गोठालाहरुलाई सो क्षेत्रमा पशु चरन नगर्न भनेका थिए । तर स्थानीय बासिन्दाको विरोधपछि चिनियाँ सैनिक फिर्ता भएको पत्रिकाले उल्लेख गरेको छ ।
