परराष्ट्रमन्त्री ज्ञवालीसँगको भेटपछि भारतीय रक्षामन्त्रीले भनेः नेपालसँगको सम्बन्ध केबल सरकारमा मात्रै सीमित छैन
काठमाण्डु – परराष्ट्रमन्त्री प्रदीपकुमार ज्ञवाली र भारतीय रक्षामन्त्री राजनाथ सिंहबीच भेटवार्ता भएको छ ।
भारतको औपचारिक भ्रमणमा रहेका मन्त्री ज्ञवालीले नयाँदिल्लीस्थित अकबर रोडमा रहेको रक्षामन्त्री सिंहको निवासमा पुगेर भेटवार्ता गरेका हुन् । नेपाल मामिलाका विज्ञसमेत रहेका रक्षामन्त्री सिंहले परराष्ट्रमन्त्री ज्ञवालीसँगको भेटबारे सामाविक सञ्जाल ट्वीटरमार्फत जानकारी दिएका हुन् ।
उनले भारत–नेपालको सम्बन्ध केबल सरकारमा मात्रै सीमित नभएर दुई देशका नागरिकबाट अघि बढेको बताएका छन् । सिंहले ट्विटरमा लेखेका छन्, ‘भारतको नेपालसँगको सम्बन्ध केबल सरकारमा मात्रै सीमित छैन । यो सम्बन्ध दुई देशका नागरिकबाट अघि बढेको छ ।’
उनीहरुको भेटमा परराष्ट्र सचिव भरतराज पौड्याल र भारतका लागि नेपाली राजदूत नीलाम्बर आचार्य समेत उपस्थित थिए । नेपाल भारत संयुक्त आयोगको बैठकमा भाग लिन नयाँदिल्ली पुगेका परराष्ट्रमन्त्री ज्ञवालीले भारतमा आज उच्चस्तरीय राजनीतिक भेटवार्ता गरिरहेका छन् ।
मन्त्री ज्ञवाली नेपाल भारत संयुक्त बैठकमा सहभागी हुन बिहीबार भारत प्रस्थान गरेका थिए । उनी आज साँझ स्वदेश फर्किने कार्यक्रम छ ।
Had a wonderful meeting with the Foreign Minister of Nepal, Shri @PradeepgyawaliK today. India’s relations with Nepal are not limited to governments in both the countries but it is driven by the people of the both the nations. India-Nepal relations offer limitless potential. pic.twitter.com/zFAMsz1Isz
— Rajnath Singh (@rajnathsingh) January 16, 2021