अपराध न्यूनीकरण गर्ने गरि काम गर्न प्रहरी श्रीमती सङ्घलाई आइजीपी खनालको आग्रह
काठमाडौं – प्रहरी महानिरीक्षक सर्वेन्द्र खनालले महिला हिंसा एवम् महिला तथा बालबालिकाबिरुद्ध हुने अपराध न्यूनीकरण गर्न र लागूऔषध दुर्व्यसनीलाई सहि मार्गमा ल्याउने गरि काम गर्न प्रहरी श्रीमती सङ्घलाई आग्रह गरेका छन् ।
भृकुटीमण्डपमा बुधबार आयोजित विशेष समारोहमा नेपाल प्रहरी श्रीमती सङ्घको ३५औं बार्षिकोत्सव कार्यक्रम समारोहमा बोल्दै आईजीपी खनालले अपराध न्यूनीकरणका कामसँगै संघको भूमिकामा समेत परिवर्तन आउनुपर्ने जोड दिँदै संघले खेलेको भूमिका सबैको मन मनमा पुग्नुपर्ने बताए ।
साथै राष्ट्र र नागरिक सेवामा समर्पित प्रहरीले सामना गर्नुपर्ने कठिन परिस्थितिलाई सहज बनाउन परिवारले दिएको योगदानको उच्च प्रशंसा गर्दै प्रहरी महानिरीक्षक खनालले सामाजिक
सेवाका कार्य हरेक पीडितको दिलमा बस्न सके सफल हुने उल्लेख समेत गरे ।
उक्त अवसरमा प्रहरी महानिरीक्षक खनालले संघलाई निरन्तर रुपमा उल्लेखनीय सहयोग गर्ने प्रहरी कर्मचारी तथा सेवामूलक कार्यमा सहयोग र्पुयाउने महानुभावहरुलाई प्रशंसापत्र तथा मायाको चिनो प्रदान गर्दै संघबाट प्रकाशित वार्षिक स्मारिका ूसहचरीू को विमोचन समेत गरे ।
उक्त अवसरमा नेपाल प्रहरी श्रीमती सङ्घकी अध्यक्ष प्रमिला खनालले २०७५ सालमा संचालित एसईई परीक्षामा उत्कृष्ट अंक ल्याउने प्रहरी विद्यालयका छात्रछात्राहरु तथा प्रहरी
कार्यालय सहयोगीका सन्ततीहरुलाई नगद पुरस्कार तथा प्रमाणपत्र वितरण गरिन् ।
समारोहमा संघकी अध्यक्ष खनालले संघले प्रकोप पीडितलाई सहयोगी हात र आश्रय उपलब्ध गराएको र विविध दुर्व्यसन र कुलततर्फ लागि बाटो बिराएकालाई पुन सही मार्गमा ल्याउने आधार बनेको उल्लेख गर्दै आसरा सुधार केन्द्रलाई धरानको पानबारी र काठमाडौंको तिलगंगामा थप विस्तार गरेको जानकारी दिइन् ।
नेपाल प्रहरीले संचालन गरेको समुदाय–प्रहरी साझेदारी अवधारणा सामाजिक अपराध र विसंगति समाधानको लागि जनचेतना जगाउन अनुकरणीय रहेको उल्लेख गर्दै अध्यक्ष खनालले उक्त अवधारणामा संघले समेत सकृयताका साथ सहभागिता जनाउने बताइन् । साथै संघले यस वर्षबाट प्रदेश प्रहरी विद्यालयहरुका प्रहरी कर्मचारी तथा अमर प्रहरीका सन्ततीहरु मध्ये उत्कृष्ट विद्यार्थीहरुलाई पूर्ण छात्रवृत्ति प्रदान गर्ने कार्य सुरु गरेको समेत उनले बताइन् ।
संघकी महासचिव अनु पोखरेलले स्वागत मन्तव्य व्यक्त गरेकोे समारोहमा संघका पदाधिकारीहरु तथा पूर्व अध्यक्ष एवम् पूर्व पदाधिकारीहरु, प्रहरी नायव महानिरीक्षकहरु लगायत बरिष्ठ प्रहरी अधिकृतहरु, विभिन्न संघसंस्थाका प्रतिनिधिहरु एवम् आमन्त्रित अतिथिहरुको समेत उपस्थिति रहेको थियो ।
