धनुषाको लालगढ प्रहरी बृतमा कुकुर शाखा स्थापना
धनुषा – अपराध अनुसन्धानमा सहजता पुर्याउने उदेश्यका साथ धनुषाको मिथिला नगरपालिकास्थित प्रहरी चौकी लालगढ परिसरमा कुकुर शाखा स्थापना गरिएको छ ।
प्रदेश २ अन्तर्गतका जिल्लामा हुने अपराध तथा आपराधिक गतिविधिको नियन्त्रण, जघन्य प्रकृतिका अपराध अनुसन्धान तथा अतिविशिष्ट र विशिष्ट व्यक्तिको सुरक्षालगायत अन्य प्रहरी कार्यमा सहजताका लागि केनाइन शाखा स्थापना गरिएको हो ।
सो केनाइन शाखामा हाल प्रहरी नायब निरीक्षकको कमान्डमा चार वटा तालिमप्राप्त कुकुर राखिएका छन् ।
यी कुकुरको प्रयोग प्रदेश २ अन्तर्गतका जिल्लामा घटित अपराध अनुसन्धान कार्यमा ट्रयाकिङ गरी अपराधीको खोजी, विष्फोटक पदार्थ, लागूऔषधको पहिचान तथा अतिविशिष्ट र विशिष्ट व्यक्तिको कार्यक्रम स्थलको सुरक्षालगायतका कार्यमा प्रयोग गरिनेछ ।
यसअघि अपराध अनुसन्धान कार्यमा प्रदेश ३ प्रहरी कार्यालय हेटौंडाबाट तालिमप्राप्त कुकुर मगाउनुपर्ने बाध्यता रहेको थियो ।
