काठमाण्डु- झिनो चुनौती पाउँदा पनि सुदूरपश्चिम रोयल्ससँग २७ रनले पराजित भएपछि जनकपुर बोल्ट्सको नेपाल प्रिमियर लिग (एनपीएल) प्लेअफ यात्रा कठिन बनेको छ। मंगलबार कीर्तिपुरमा भएको खेलमा सुदूरपश्चिमले दिएको १२१ रनको लक्ष्य पछ्याएको जनकपुर १९.५ ओभरमा ९३ रनमै समेटियो।

सुदूरपश्चिमले २० ओभरमा ९ विकेट गुमाएर १२० रन बनाएको थियो। जनकपुरका बलरले उसलाई मध्यम योगफलमै रोके पनि जवाफी ब्याटिङमा टोलीले सुरुदेखि नै विकेट गुमायो।

जनकपुरले १०.५ ओभरमै पाँच विकेट गुमाएर ४६ रन मात्रै बनाएको थियो। त्यसपछि पनि ब्याटिङ सम्हालिन सकेन र लक्ष्यभन्दा २७ रन टाढा रहँदै अलआउट भयो।

यो हार जनकपुरका लागि सुदूरपश्चिमविरुद्धको अर्को निराशाजनक नतिजा पनि हो। पहिलो संस्करणको लिग चरणमा पनि १२४ रनको लक्ष्य पछ्याउँदा जनकपुर ५१ रनमै अलआउट भएको थियो।

अंकतालिका

खेलअघिको अंकतालिकामा जनकपुर पाँच खेलबाट दुई जितसहित चार अंकमा थियो । उता सुदूरपश्चिम पाँच खेलबाट तीन जितसहित छ अंकमा थियो।

मंगलबार जनकपुरमाथि जितको नतिजाले सुदूरपश्चिम प्ले अफका लागि बलियो भएको छ। तर यो नतिजापछि जनकपुरले धक्का ब्यहोरेको छ। मंगलबार दुवै टोलीले छैटौँ खेल खेलेका छन्। जनकपुरको खातामा चार अंक छ। सुदूरपश्चिम ८ अंकमा पुगेको छ। नेट रनरेटले ऊ काठमाण्डु गोर्खाज भन्दा पछाडि छ।

खेलपछि अंकतालिकाको अवस्था यस्तो छ:

एनपीएलको लिग चरणमा प्रत्येक टोलीले सात खेल खेल्ने भएकाले जनकपुरको अब एउटा मात्र खेल बाँकी छ। टोलीले चितवन राइनोजसँग खेल्नुपर्नेछ।

त्यो खेल जिते पनि जनकपुरको अधिकतम अंक छ पुग्छ। त्यसैले आफ्नो अन्तिम खेल जित्नुका साथै चितवन, विराटनगर र कर्णालीमध्ये केही टोलीले बाँकी खेलमा अंक गुमाउनुपर्नेछ। प्लेअफमा पुग्ने सम्भावना कायम रहे पनि अब जनकपुरको भाग्य अन्य टोलीका नतिजा र नेट रनरेटमा समेत निर्भर हुनेछ।

सुदूरपश्चिमको बाटो सहज

जितसँगै सुदूरपश्चिम आठ अंकमा पुगेको छ र प्लेअफको सम्भावना करिब पक्का गरेको छ। टोलीको एउटा खेल बाँकी छ। अंकतालिकाको शीर्ष स्थानमा रहेको काठमाडौं गोर्खाजसँग उसको आगामी खेल हुनेछ। काठमाडौं पनि आठ अंकमा छ । तर पाँच खेल खेलेको छ। उसको पनि प्लेअ पक्का जस्तै छ।

दुवै टोलीको आठ अंक हुँदा प्लेअफ करिब पक्का भएको छ। दुवै टोलीको छनोट गणितीय रूपमा मात्रै सुनिश्चित हुन बाँकी छ। लिग चरणका खेल अझै बाँकी रहेकाले अन्य टोलीको यात्रा झन् रोचक हुने भएको छ।

तालिकामा लुम्बिनी लायन्स सात अंकसहित तेस्रो स्थानमा छ। चितवन, विराटनगर र कर्णालीसँग पनि बाँकी खेलमा अंक थप्ने अवसर छ। त्यसैले शीर्ष चारको दौड खुलै छ, तर जनकपुरले अब आफ्नै नतिजामा मात्र भर पर्न सक्ने अवस्था छैन।