काठमाण्डु – नेपाल प्रिमियर लिग (एनपीएल)को तेस्रो संस्करणमा २८ खेलसँग लिग चरण सम्पन्न भएको छ । आठ टोली सहभागी प्रतियोगितामा लुम्बिनी लायन्स, सुदूरपश्चिम रोयल्स, काठमाण्डु गोर्खाज र चितवन राइनोजले लिग चरण पार गर्दै प्लेअफमा स्थान बनाएका छन्।
लिग चरणमा टोलीहरूबीचको प्रतिस्पर्धासँगै व्यक्तिगत प्रदर्शन पनि निकै रोचक रह्यो। ब्याटिङतर्फ पोखरा एभेन्जर्सका युवराज सामरा सर्वाधिक रन बनाउने खेलाडी बनेका छन् भने बलिङतर्फ चितवन राइनोजका कमलसिंह ऐरी सर्वाधिक विकेट लिने खेलाडीको सूचीमा शीर्ष स्थानमा छन्।
विशेष कुरा के छ भने सर्वाधिक रन बनाउने र सर्वाधिक विकेट लिने खेलाडीका टोली भने प्लेअफमा पुग्न सकेनन्। यसले एनपीएलमा व्यक्तिगत उत्कृष्ट प्रदर्शन र टोलीको सफलताबीचको भिन्नतालाई पनि देखाएको छ।
ब्याटिङमा सामरा शीर्ष स्थानमा
लिग चरणमा व्यक्तिगत प्रदर्शनका आधारमा पोखराका युवराज सामरा सबैभन्दा प्रभावशाली ब्याटर बने। उनले चार इनिङ्समा २९४ रन बनाएका छन्। उनको ब्याटिङ औसत ७३.५० र स्ट्राइक रेट १७९.३ रहेको छ। प्रतियोगितामा उनको उच्च स्कोर १०२ रन हो।
तर, युवराजको उत्कृष्ट प्रदर्शनका बाबजुद पोखरा प्लेअफमा पुग्न सकेन। पोखराले सात खेलमा दुई जित मात्रै निकाल्दै सातौँ स्थानमा रहेर प्रतियोगिता टुंग्याएको छ।
सर्वाधिक रन बनाउने खेलाडीको सूचीमा दोस्रो स्थानमा विराटनगर किंग्सका लोकेश बम छन्। उनले सात इनिङ्समा २४२ रन बनाएका छन्। उनको उच्च स्कोर ८७ रन हो भने ब्याटिङ औसत ३४.५७ र स्ट्राइक रेट १४२.४ रहेको छ।
तेस्रो स्थानमा पोखरा एभेन्जर्सकै कुशल भुर्तेल छन्। उनले सात इनिङ्समा २३५ रन बनाएका छन्। उनको उच्च स्कोर ९९ रन रहेको छ। ३३.५७ को औसत र १४८.७ को स्ट्राइक रेटमा उनले ब्याटिङ गरेका छन्।
काठमाण्डु गोर्खाजका राशिद खान चौथो स्थानमा छन्। उनले ६ इनिङ्समा १८६ रन बनाएका छन्। उनको ब्याटिङ औसत ३७.२० र स्ट्राइक रेट १४.२ रहेको छ। चितवन राइनोजका रवि बोपारा १८४ रनसहित पाँचौँ स्थानमा छन्। पाँच इनिङ्समा ब्याटिङ गरेका उनको औसत ४६ रहेको छ।
यीबाहेक कर्णालीका अरिफुल इस्लामले १८२, पवन सर्राफले १६७ तथा सुदूरपश्चिम रोयल्सका कप्तान दीपेन्द्रसिंह ऐरीले १५० रन बनाएका छन्। चितवनका डेविड मलानले १४९ र लुम्बिनीका डार्सी शर्टले १४८ रन जोडेका छन्।
बलिङमा ऐरी र ढकालको दबदबा
बलिङतर्फ चितवनका कमलसिंह ऐरी र रिजन ढकालले समान १२ विकेट लिएका छन्। कमलसिंहले १८ ओभर बलिङ गर्दै ५.७२ को इकोनोमीमा विकेट लिएका हुन्। उनको उत्कृष्ट प्रदर्शन २६ रन दिएर चार विकेट लिनु हो।
ढकालले १९ ओभरमा १२ विकेट लिएका छन्। उनको उत्कृष्ट प्रदर्शन २६ रन दिएर चार विकेट लिनु हो। ६.६३ को इकोनोमीमा बलिङ गरेका रिजन चितवनका प्रमुख बलिङ हतियार बनेका छन्।
यस्तै जनकपुर बोल्ट्सका राहुल यादवले पनि १२ विकेट लिएका छन्। उनले २३ ओभर बलिङ गर्दै ६.८७ को इकोनोमी कायम गरेका छन्। काठमाण्डुका जहान्दाद खानले २५.३ ओभरमा १२ विकेट लिँदै शीर्ष विकेटकर्ताको सूचीमा आफूलाई उभ्याएका छन्।
यसैगरी, ११ विकेट लिनेमा जनकपुरका हरमित सिंह र कर्णालीका मार्क वाट छन्। उनीहरूले क्रमशः ५.६६ र ६.१९ को इकोनोमीमा बलिङ गरेका छन्।
१० विकेट लिने खेलाडीमा सुदूरपश्चिमका अनिल खरेल, कर्णालीका हुसेन तलत र सोमपाल कामी रहेका छन्। लुम्बिनीका शेर मल्लले नौ विकेट लिएका छन्।
प्लेअफ पुगेका चार टोलीका प्रमुख खेलाडी
प्लेअफमा पुगेका चार टोलीको प्रदर्शन हेर्दा ब्याटिङ र बलिङ दुवैतर्फ केही खेलाडीले महत्त्वपूर्ण योगदान दिएका छन्।
लुम्बिनी लायन्स
डिफेन्डिङ च्याम्पियन लुम्बिनी लायन्स लिग चरणको पहिलो स्थानमा रहेको छ । लुम्बिनीले सात खेलबाट ११ अंक जोडेको छ। टोलीको ब्याटिङमा डार्सी शर्टले १४८ रन बनाएका छन् भने कप्तान रोहित पौडेलले १०० रन जोडेका छन्। बलिङमा शेर मल्लले नौ विकेट लिएका छन्। किशोर महतोले आठ विकेट लिँदै बलिङमा साथ दिएका छन्।
सुदूरपश्चिम रोयल्स
लिग चरणको दोस्रो स्थानमा रहेको सुदूरपश्चिमले सात खेलबाट १० अंक जोडेको छ। कप्तान दीपेन्द्रसिंह ऐरीले १५० रन बनाएका छन्। ब्रान्डन म्याकमुलेनले १२४ रन जोडेका छन्। बलिङमा अनिल खरेलले १० विकेट लिएका छन् भने स्कट कुगेलाइनले नौ विकेट हात पारेका छन्।
काठमाडौं गोर्खाज
लिग चरणको तेस्रो स्थानमा पुगेको काठमाण्डुले आठ अंकसहित तेस्रो स्थान सुरक्षित गरेको छ। टोलीको ब्याटिङमा राशिद खानले १८६ रन बनाएका छन्। डेभिड वार्नरले १२७ रन जोडेका छन्। बलिङमा जहान्दाद खानले १२ विकेट लिएका छन्। सन्तोष यादव र कप्तान करण केसीले समान आठ विकेट लिएका छन्।
चितवन राइनोज
लिग चरणको चौथो स्थानमा पुग्न सफल चितवनले सात अंकसहित प्लेअफमा स्थान बनाएको छ। टोलीको ब्याटिङमा रवि बोपाराले १८४ रन बनाएका छन्। डेविड मलानले १४९ रन जोडेका छन्। बलिङमा कमलसिंह ऐरी र रिजन ढकालले समान १२ विकेट लिएका छन्। उनीहरू प्रतियोगिताकै सर्वाधिक विकेट लिने खेलाडीको सूचीमा संयुक्त रूपमा शीर्ष स्थानमा छन्।
प्लेअफमा ब्याटिङ र बलिङको परीक्षा
लिग चरणमा व्यक्तिगत रूपमा उत्कृष्ट प्रदर्शन गरेका केही खेलाडीका टोली प्रतियोगिताबाट बाहिरिएका छन्। सर्वाधिक रन बनाउने युवराज सामरा, लोकेश बम र कुशल भुर्तेलका टोली प्लेअफमा पुग्न सकेनन्। त्यस्तै, सर्वाधिक विकेट लिने खेलाडीमध्ये जनकपुरका राहुल यादव र कर्णालीका मार्क वाट पनि प्रतियोगिताको प्लेअफ चरणमा देखिने छैनन्।
अब उपाधि यात्रामा रहेका चार टोलीका खेलाडीको प्रदर्शन निर्णायक हुनेछ। पहिलो क्वालिफायरमा लुम्बिनी लायन्स र सुदूरपश्चिम रोयल्स भिड्दा दुवै टोलीका ब्याटर र बलरको प्रदर्शन महत्त्वपूर्ण हुनेछ। अर्को दिन हुने एलिमिनेटरमा काठमाडौं गोर्खाज र चितवन राइनोज आमनेसामने हुनेछन्।
लिग चरणमा व्यक्तिगत रूपमा उत्कृष्ट प्रदर्शन गरेका खेलाडीले प्लेअफमा पनि त्यही लय कायम राख्न सक्छन् वा सक्दैनन् भन्ने चासो छ। विशेषगरी चितवनको बलिङ, काठमाण्डुको विदेशी खेलाडीको योगदान, सुदूरपश्चिमको अलराउन्ड प्रदर्शन र लुम्बिनीको सन्तुलित टिम संयोजन प्लेअफका मुख्य आकर्षण हुनेछन्।


प्रतिक्रिया