काठमाण्डु – सुनसरीको देवानगञ्ज गाउँपालिका–३ कप्तानगञ्जमा भएको हिंसात्मक घटनाप्रति राष्ट्रिय स्वतन्त्र पार्टी (रास्वपा) सभापति रवि लामिछाने गम्भीर बनेका छन् ।

पार्टीको तर्फबाट मंगलबार दिउँसो आफैँ प्रेस विज्ञप्ति जारी गरेका सभापति रविले साँझ गृहमन्त्री सुधन गुरुङलाई आफ्नै निवासमा बोलाएका छन् ।

बूढानिलकण्ठ नगरपालिका–६ इटालीटारस्थित सभापति रविको निवासमा गृहमन्त्री गुरुङ साँझ साढे ८ बजे प्रवेश गरेका छन् । सभापति रविसँग गृहमन्त्री सुधनले सुनसरी घटनाबारे छलफल गरिरहेका छन् ।

सभापति रविले दिउँसो विज्ञप्ति जारी गर्दै संयमता अपनाउन आग्रह गरेका थिए भने साँझ प्रधानमन्त्री तथा मन्त्रिपरिषद् कार्यालयले प्रेस विज्ञप्ति जारी गरेर पीडितलाई क्षतिपूर्ति र घाइतेको नि:शुल्क उपचारको प्रतिबद्धता जनाएको छ ।

सरकारले घटनामा ज्यान गुमाएकाप्रति श्रद्धाञ्जली अर्पण गर्दै घाइते नागरिक तथा सुरक्षाकर्मीहरूको शीघ्र स्वास्थ्यलाभको कामना गरिएको छ ।

सरकारले घटनाको सत्यतथ्य छानबिन गर्न गृह मन्त्रालयले ७ दिनभित्र प्रतिवेदन पेश गर्ने कार्यादेशसहित छानबिन समिति गठन गरिसकेको र समितिले काम सुरु गरिसकेको जनाएको छ । घाइतेहरूको नि:शुल्क उपचारको व्यवस्था स्वास्थ्य तथा खाद्य स्वच्छता मन्त्रालयमार्फत मिलाइएको पनि विज्ञप्तिमा उल्लेख छ ।

सरकारले कुनै पनि समस्या, असन्तुष्टि वा विवादको समाधान हिंसा वा मुठभेडबाट सम्भव नहुने स्पष्ट गर्दै धार्मिक सहिष्णुता, सामाजिक सद्भाव र आपसी एकतालाई कमजोर पार्ने गतिविधिमा संलग्न नहुन सबै पक्षलाई आग्रह गरेको छ । भ्रामक सूचना वा अफवाह नफैलाउन र त्यस्ता सूचनाबाट प्रभावित नभई उच्च संयमता अपनाउन पनि अपिल गरिएको छ ।

सरकारले वर्तमान परिस्थितिमा मुलुकमा शान्ति, सुरक्षा तथा सामाजिक र धार्मिक सद्भाव कायम राख्न सबै राजनीतिक दल, नागरिक समाज, धार्मिक संघसंस्था, आमसञ्चार माध्यम र सर्वसाधारणलाई सहयोग गर्न आह्वान गरेको छ ।