काठमाण्डु– नितेश तिवारी निर्देशित बलिउड फिल्म ‘रामायण’ले प्रदर्शनको दुई दिनमै भारतमा ११२ करोड ९० लाख भारतीय रुपैयाँ नेट कमाइ गरेको छ। यद्यपि, फिल्मको दोस्रो दिनको व्यापारमा गिरावट आएको छ।

फिल्मले प्रदर्शनको पहिलो दिन ६४ करोड ८५ लाख रुपैयाँ कमाएको थियो। दोस्रो दिन शुक्रबार भने कमाइ घटेर ४८ करोड ५ लाख रुपैयाँमा सीमित भएको व्यापारसम्बन्धी वेबसाइट स्याकनिल्कले जनाएको छ।

पहिलो दिनको कमाइ अपेक्षाअनुसार नभए पनि ‘रामायण’ले बलिउड इतिहासकै चौथो ठूलो ओपनिङ गर्ने फिल्मको कीर्तिमान बनाएको थियो। फिल्मले दुई दिनमै १०० करोडको आँकडा पार गरेको छ। अब दीपावली सप्ताहन्तमा व्यापारमा सुधार आउने अपेक्षा गरिएको छ।

फिल्मको कमाइ मुख्यतः हिन्दी संस्करणमा निर्भर देखिएको छ। अभिनेता यशले रावणको भूमिका निर्वाह गरे पनि कन्नड संस्करणको व्यापार भने कमजोर छ। कन्नड संस्करणले पहिलो दिन ७ करोड ५० लाख रुपैयाँ मात्रै कमाएको थियो। तेलुगु संस्करणले तुलनात्मक रूपमा राम्रो प्रदर्शन गरे पनि तमिल र मलयालम संस्करणको व्यापार सुस्त देखिएको छ।

पहिलो दिनको कमाइमा ‘रामायण’ले ‘पठान’, ‘एनिमल’ र ‘दृश्यम २’ जस्ता फिल्मलाई पछाडि पारेको थियो। तर, रणवीर सिंह अभिनीत ‘धुरन्धर २’ को १०२ करोड रुपैयाँको ओपनिङ र ‘आदिपुरुष’को ८६ करोड ७५ लाख रुपैयाँको पहिलो दिनको कमाइलाई भने उछिन्न सकेन।

दुई दिनको कमाइमा पनि ‘रामायण’ ‘आदिपुरुष’भन्दा पछाडि छ। ‘आदिपुरुष’ले प्रदर्शनको पहिलो दुई दिनमै भारतमा १५१ करोड रुपैयाँ नेट कमाइ गरेको थियो। ‘रामायण’ले भने दुई दिनमा ११२ करोड ९० लाख रुपैयाँ कमाएको छ।

यद्यपि, ‘आदिपुरुष’को पहिलो दुई दिन शुक्रबार र शनिबार परेका थिए भने ‘रामायण’को पहिलो दुई दिन बिहीबार र शुक्रबार परेकाले व्यापार तुलना गर्दा प्रदर्शनको दिनलाई पनि ध्यान दिनुपर्ने देखिन्छ।

नमित मल्होत्राको प्राइम फोकस स्टुडियो, डीएनईजी र यशको मोन्स्टर माइन्ड क्रिएसन्सको सहकार्यमा निर्माण भएको ‘रामायण’ दुई भागमा प्रदर्शन गर्ने योजना छ।

फिल्ममा रणवीर कपुर भगवान् राम, साई पल्लवी सीता, यश रावण र रवि दुबे लक्ष्मणको भूमिकामा छन्। फिल्मको पहिलो भाग नोभेम्बर ५, २०२६ मा विश्वव्यापी रूपमा प्रदर्शनमा आएको हो भने दोस्रो भाग सन् २०२८ को दीपावलीमा प्रदर्शन गर्ने तयारी छ।