आज पनि संसद अवरुद्ध गर्ने एमालेको तयारी
काठमाण्डु- प्रमुख प्रतिपक्षी दल नेकपा एमालेले आज पनि संघीय संसदका दुवै सदन अवरुद्ध गर्ने भएको छ । प्रधानमन्त्री पुष्पकमल दाहाल प्रचण्डको अभिव्यक्तिलाई लिएर राजीनामा माग्दै आएको एमालेले आजको बैठक पनि अवरुद्ध गर्ने भएको हो ।
प्रधानमन्त्री प्रचण्डले गत सोमबार व्यवसायी प्रितम सिंह आफूलाई प्रधानमन्त्री बनाउन पटकपटक दिल्ली गएको बताएका थिए । प्रधानमन्त्री प्रचण्डको उक्त अभिव्यक्ति देशविरोधी भएकाले प्रचण्डले तत्काल राजिनामा दिनुपर्ने एमालेको माग छ । एमालेले प्रधानमन्त्री प्रचण्डले राजिनामा नदिएसम्म संसद चल्न नदिने अडान राखेको छ । यता सत्ता गठबन्धन दलहरुले भने प्रधानमन्त्री प्रचण्डले राजिनामा नदिने बताएका छन् ।
