कुटनीति ब्रेकिंग न्युज

कूटनीतिक विवादमा अमेरिकी राजदूत : ‘राजदूतसँग गफगाफ’ घोषणापछि चौतर्फी प्रहार

काठमाडौं – दुई दिनअघि गत आईतबार नेपालस्थित अमेरिकी दूतावासको फेसबूक पेजमा एउटा भिडियो सन्देश राखिएको छ । जसमा भनिएको छ – अमेरिकी राजदूत र्‍यान्डी बेरीले नेपालीसँग सोझै ‘गफगाफ’ गर्नेछन् ।कार्यक्रमको नाम ‘राजदूतसँग गफगाफ’ राखिएको छ । जुन कार्यक्रमलाई लिएर अहिले नेपाली राजनीति र कूटनीतिक क्षेत्र तरङ्गित बनेको छ । राजदूत बेरीमाथि राजनीतिक र प्रशासनिक नेतृत्व खनिएको छ ।

Dish Home

दूतावासले फेसबूक पेजमा राखेको सन्देशमा लेखिएको छ – ‘तपाईंले राजदूत बेरीलाई एउटा प्रश्न सोध्ने अवसर पाउनुभयो भने त्यो प्रश्न के हुन्थ्यो ? हामीले भेटेका केही महानुभावहरूलाई प्रश्न सोध्ने अवसर दिने गरी साप्ताहिक भिडियो सिरिजको रुपमा ‘राजदूतसँग गफगाफ’ शुरू गर्न गैरहेका छौं । हरेक सोमबार नयाँ प्रश्न र नयाँ उत्तर यहाँहरूसमक्ष आउनेछ । हेर्दै गर्नुहोला ।’ ‘राजदूतसँग गफगाफ’ कार्यक्रमबारे संसद, सरकार र सञ्चारमाध्यममा चर्चा शुरू भएको छ । राजदूतले सोझै जनतासँग गफगाफ गर्न लागेको भन्दै सर्वत्र आलोचना भएको छ ।

सत्तारुढ नेपाल कम्युनिस्ट पार्टी (नेकपा) का वरिष्ठ नेता तथा पूर्व प्रधानमन्त्री माधवकुमार नेपालले अमेरिकी राजदूत र्‍यान्डी बेरीले ‘जनतासँग गफगाफ’ संवाद कार्यक्रम सञ्चालन गर्न लागेकोमा असन्तुष्टि व्यक्त गरेका छन् । दूतावासको घोषणा अनुसार आगामी सोमबार कार्यक्रम प्रसारण हुनेछ र सम्भवतः त्यसका लागि आवश्यक तयारी समेत भइसकेको छ ।

वरिष्ठ नेता नेपालले अन्तर्राष्ट्रिय कूटनीतिक अभ्यासमै नभएको संवाद कार्यक्रम कूटनीतिक मर्यादा विपरीत हुने भएकाले सञ्चालन नगर्न दूतावासलाई ध्यानाकर्षण गराएका छन् ।
बुधबार संघीय संसद परिसरमा सञ्चारकर्मीलाई प्रतिक्रिया दिँदै नेता नेपालले कूटनीतिक मर्यादाको पालना ठूला देशले गर्नुपर्ने पनि बताए । ‘कूटनीतिक मर्यादाको पाठ सिकाउने देशहरूले त झन् त्यसको पालना गर्नैपर्छ,’ उनले भने ।

नेकपाका नेता भीम रावलले कूटनीतिक मर्यादा विपरीत गएर अमेरिकी राजदूत बेरीले नेपाली जनतासँग प्रत्यक्ष रुपमा संवाद गर्ने खालका कुनै पनि गतिविधि गर्न नमिल्ने बताए । ‘कूटनीतिक क्षेत्रको कानून, मर्यादा कुनै पनि दृष्टिले संवाद कार्यक्रम सञ्चालन गर्ने अनुमति छैन,’ उनले भने ।

नेपाली कांग्रेसका सांसद राजेन्द्रकुमार केसीले सरकारको अनुमति विना अमेरिकी राजदूत बेरीले जनतासँग प्रत्यक्ष रुपमा गएर कुनै पनि कार्यक्रम गर्न नमिल्ने बताए । दूतावासको गतिविधिबारे सत्तापक्ष–प्रतिपक्ष दुवैको एउटै मत देखिएको छ । राजदूत बेरीलाई गफगाफ कार्यक्रम सञ्चालन गर्न दिने पक्षमा दुवै छैनन् । राष्ट्रिय जनता पार्टी नेपालका सांसद लक्ष्मणलाल कर्णले पनि सरकारसँग अनुमति नलिई राजदूत बेरीलाई संवाद कार्यक्रम सञ्चालन गर्ने अधिकार नभएको बताए ।

परराष्ट्र मन्त्रालयले समेत राजदूत बेरीलाई कार्यक्रम सञ्चालन नगर्न ध्यानाकर्षण गराइसकेको छ । सामाजिक सञ्जाल र सञ्चारमाध्यममा विभिन्न प्रतिक्रिया उत्पन्न भएपछि परराष्ट्र सचिव शंकर बैरागीले मन्त्रालयको ध्यानाकर्षण भएको बताए । उनका अनुसार राजदूतको स्वेच्छाले संवाद कार्यक्रम सञ्चालन गर्न मिल्दैन । अमेरिकी दूतावासले कार्यक्रमबारे मन्त्रालयलाई समेत कुनै जानकारी गराएको छैन ।

पूर्व परराष्ट्र सचिव दुर्गाप्रसाद भट्टराईले ट्विटरमा लेखेका छन्, ‘आफ्नो राष्ट्रिय स्वार्थको स्पेस खाली रहे अरू कसैकाले त्यो भरिन्छ । कूटनीतिक वृत्तबाट सोझै जनतासँग स्टाइलको लहरले सुनामीको रूप लिनु पहिले नै स्पष्टता, सुझबुझ र सतर्कता रहँदा कति राम्रो राम्रो ।’ उनले यसबारे सतर्क रहन सरकार र दूतावासको ध्यानाकर्षण गराएका छन् ।

काठमाडौंस्थित दूतावासबारे घोषणा गरिएको संवाद कार्यक्रमबारे विस्तृत जानकारी र उद्देश्य प्रष्ट पारिएको छैन । तर संवादको तरङ्ग सबैतिर फैलिएको छ । राजनीतिक नेतृत्व र सरकारबाट संवादको विरोध भइरहँदा दूतावासले अब के गर्छ ? स्पष्ट जवाफ पाउन बढीमा आगामी सोमबारसम्म पर्खनैपर्नेछ ।

 

यस्तो थियो उनको भिडियो आह्वान- 

 

Comments

comments

Now Get KathmanduPati App on your mobiles.

Android AppiOS App
ad

धेरै पढिएको समाचार

Vianet
Civil
Shivam Cement
Yeti Airlines
Kumari Bank
Shikhar Insurance
Muktinath Development Bank
Nepal Vidhyapith

Now get KathmanduPati App on your mobiles.

Android AppiOS App
Scroll to Top