काठमाण्डु – सभामुख अग्नी प्रसाद सापकोटाले पूर्वसभामुखहरुसँग छलफल गरेका छन् ।

मंगलबार सिंहदरबारमा सभामुख सापकोटाले पाँच जना पूर्वसभामुखहरुसँग संसद विघटनलगायतका विषयहरुमा छलफल गरेका हुन् ।

छलफलका क्रममा पूर्वसभामुखहरुले प्रतिनिधिसभा विघटन असंवैधानिक कदम भएको बताएका थिए ।

पूर्वसभामुख रामचन्द्र पौडेलले संसद विघटनलगायत संसद पुनःस्थापना भएपछि मात्रै बजेट ल्याउनुपर्ने विषयमा छलफल भएको बताए । उनले अध्यादेशमार्फत बजेट ल्याउन हतारो नहुने विषयमा पनि छलफल भएको बताए ।

अर्की पूर्वसभामुख ओनसरी घर्तीले संसद विघटन असंवैधानिक कदम भएको बताइन् ।

‘जनताको प्रतिनिधित्व हुने संस्था प्रतिनिधिसभा माथि आक्रमण भयो । दुई पटकसम्म संसद विघटन गरियो यो पूर्णतया असंवैधानिक छ’, उनले भनिन् ।

सभामुखले सक्रिय भएर बातावरण बनाउनुपर्नेमा आफूहरुले जोड दिएको उनले बताइन् ।