काठमाण्डु – ‘प्रगतिशील राष्ट्रिय अभियान’का अगुवा सुदन किराँतीले देशलाई वर्तमान अवस्थामा पुर्‍याउने नैतिकताहीन र अहंककारी नेताहरूलाई आगामी निर्वाचनबाट जरैदेखि उखेलेर फाल्न सबैलाई आह्वान गरेका छन् ।

बिहीबार काठमाण्डुमा आयोजित पत्रकार सम्मेलनमा उनले नैतिकताहीन र अहंककारी नेताहरूलाई आगामी निर्वाचनबाट जरैदेखि उखेलेर फाल्ने भन्दै भ्रष्टाचार र बेथितिको दलदलबाट सफाइ गर्नुपर्ने बताए ।

युवाहरूको आन्दोलनको समयमा हेलिकोप्टर चढेर भागेका र सैनिक ब्यारेकमा लुक्न बाध्य भएका असफल अहंकारी नेताहरूमा रूपान्तरणको कुनै संकेत नभएको पनि उनले बताए ।

नेता किरातीले आफूहरूले माओवादी केन्द्रभित्र लोकतान्त्रिक मूल्य स्थापित गर्न, पार्टीभित्र पारदर्शिता कायम गर्न, सम्पत्ति छानबिन गर्न र देशको समग्र अर्थतन्त्रको पुन:संरचना लागि पहल गरेको तर नेतृत्वले बेवास्ता गरेको बताए ।

किरातीले भने, ‘हामीले माओवादी पार्टीभित्र ३ वर्षदेखि लोकतान्त्रिक मूल्य स्थापित गर्न, पार्टीभित्र पारदर्शिता कायम गर्न, सम्पत्ति छानबिन गर्न, देशको समग्र अर्थतन्त्रको पुनर्संरचनाको पहल गर्न, जनजीविका प्रश्नहरुको समाधान गर्नका र पहल लिनका लागि तथा रूपान्तरणसहित नेतृत्व युवा पुस्तामा हस्तान्तरण गर्ने बहस सघन रूपमा उठाएका थियौं । ती एजेन्डाहरूलाई बेवास्ता गर्दै, केन्द्रीय समितिले पटक–पटक महाधिवेशनको मिति तोकेर पनि त्यसको बेवास्ता गर्ने काम भयो । स्थापित पार्टी र आन्दोलनलाई लोकतान्त्रिकीकरण गराउने, जवाफदेही बनाउने तथा विधिमा सञ्चालन गर्ने हाम्रो प्रयत्नलाई असफल बनाउने काम भयो ।’ अभियानले ७ बुँदे अपिल समेत गरेको छ ।

१. भ्रष्टाचार, विभेद र असमानताको रूपमा रहेका नेपाली समाजको मुख्य शत्रुमाथि विजय हासिल गरौं ।

२. सांस्कृतिक समतामा आधारित समाज निर्माण गरौं ।

३. नेपाली राजनीतिको आधारभुत पुन:संरचना गरौं ।

४. सबै अग्रगामी आन्दोलनका सहिद, घाइते र बेपत्ता योद्धाहरूको सपना पूरा गरौं ।

५. जुनसुकै मूल्यमा निर्वाचनलाई सफल पारौं, जनताको एकताको बलमा अहंकारी र असफलहरूलाई बिदा गरौं ।

६. देशभित्र र बाहिर जहाँसुकै रहेका नेपालीहरूले सबै तहमा प्रगतिशील राष्ट्रिय अभियान सम्पर्क समिति गठन गरौं ।

७. जेनजी विद्रोहबाट स्थापित मुद्दाहरूलाई यथाशीघ्र सम्बोधन गर्न गराउन चौतर्फी सक्रिय बनौं । सुदृढ राष्ट्र सभ्य नागरिक बदलिँदो राष्ट्रिय शक्ति निर्माण गर्ने एजेण्डासहित राजनीतिको समग्र पुन:संरचना गर्ने लक्ष्यप्रति प्रतिबद्ध होऔं ।

अभियानले ३१ सदस्यीय केन्द्रीय संयोजन समिति गठन समेत गरेको छ । जसमा सुदन किराँती, टेकेन्द्र भट्ट, नारायणी शर्मा, मदन भट्टराई, मदन लिम्बु, सम्झना राई, पुजन सिंह, अरविन्द यादव, लक्ष्मी गुरुङ, प्रकाशचन्द पाण्डे, राजु आलेमगर, सन्तोष विष्ट, प्रेम बहादुर तामाङ, यज्ञबल्लभ शर्मा, क्षितिज सापकोटा, बाबुराम नेपाली, किस्मत कुमार बिक, सन्दिप पुन, गेहेन्द्र ढकाल, भीमबहादुर मल्ल, गोरख बहादुर केसी, जटिल कार्की, देवीराम देवकोटा, जन्मदेव जैसी, दिपक साउँद, पुष्प न्यौपाने, डा.अच्युत भट्ट, बिमला सिंह, निर्मला गौतम, रामहरि पुडासैनी र धर्मराज खतिवडा रहेको छ ।