कर्णाली – कर्णाली उत्सवको ‘सडकदेखि सदनसम्म’को सत्रमा जेनजी पुस्ताका अगुवाहरू वक्ताको रूपमा सहभागी भएका छन् ।

उनीहरूले जेनजी आन्दोलन र त्यसपछिका अभ्यासहरूमा समीक्षा गरे तर उनीहरूले युवापुस्ताको आवाज जनमतद्वारा अनुमोदन भए पनि ढुक्क हुने अवस्था नभएको बताए ।

जेनजी पुस्ताले चाहेको सुशासन, भ्रष्टाचार विरुद्धको लडाइँ र न्यायको खोजीको आन्दोलनले अझै पूर्णता नपाएको उनीहरूको गुनासो छ ।

जेनजी अगुवा मनिष खनालले सुशासनको मागसहित आफ्नो पुस्ताले आन्दोलन गरेको र त्यहीँ बलमा जनताबाट चुनाव जितेर सदनमा पुगेको दाबी गरे ।

‘हामी सदनमा जानु मात्र आन्दोलनको सफलता भन्न त नमिल्ला,’ उनले भने, ‘आफ्नो पुस्ताले राखेका मागहरू सम्बोधनको लागि सदनमा निरन्तर आवाज उठाउनेछु ।’

जेनजी अगुवा रक्षा बमले आन्दोलनपछि बनेको कार्की आयोगको प्रतिवेदन पूर्ण नहुँदा आफ्ना मागहरू पूरा हुने र जेनजी आन्दोलनले न्याय पाउनेमा शंका भएको बताइन् । ‘सरकारले कार्की आयोगको प्रतिवेदन सार्वजनिक गरेको छैन,’ उनले भनिन्, ‘हामी शान्तिपूर्ण आन्दोलनमा थियौँ । आन्दोलन कसरी हिंसात्मक बन्यो भन्ने सत्य बाहिर आउनुपर्छ ।’

आयोगले भदौ २३ गतेको आन्दोलनलाई मात्र केन्द्रबिन्दुमा राखेर २४ गते भुलेको उनको आरोप छ ।

जेन्जी अगुवा धिरज जोशीले सडक र सरकारको भूमिकाबिच सन्तुलन आवश्यक रहेको बताए । ‘सरकारले केवल आन्दोलन होइन, समग्र देश, राष्ट्रिय सुरक्षा र सेवा प्रवाहलाई ध्यानमा राखेर काम गर्नुपर्छ,’ उनले भने ।

जेनजी आन्दोलनका घाइते प्रकाश लोहोराले जेनजी आन्दोलनले अपेक्षित न्याय नपाएको गुनासो गरेका छन् ।

‘हाम्रो आन्दोलन भ्रष्टाचारविरुद्ध थियो । मुलुकको बेथितिविरुद्ध थियो तर अहिलेसम्म न्याय पाएको अवस्था छैन,’ उनले भने ।

जबसम्म आमनागरिकले सुशासन र परिवर्तनको अनुभूति गर्दैनन्, तबसम्म आन्दोलनका मुद्दाले पूर्णता नपाउने उनीहरूको तर्क छ ।