काठमाण्डु- विश्वकप फुटबलको फाइनलको घडी आइपुगेको छ । स्पेन अब आफ्नो दोस्रो विश्वकप उपाधिबाट केवल एक कदम टाढा छ ।

विश्वकपको उपाधिका लागि सोमबार राति पौने १ बजे साविक विजेता अर्जेन्टिना र सन् २०१० को विजेता स्पेनबीच खेल हुनेछ ।

फाइनलको पूर्वसन्ध्यामा स्पेनिस खेलाडीहरू अर्जेन्टिनालाई हराएर सन् २०१० जस्तै फेरि विश्वकप ट्रफी उचाल्नेमा विश्वस्त छन् ।

यो आत्मविश्वासका धेरै आधार छन्–युरो २०२४ को उपाधि, लगातार ३७ खेलसम्मको अपराजित यात्रा र सबैभन्दा महत्त्वपूर्ण सेमिफाइनलमा फ्रान्समाथि हासिल गरेको जित हो ।

यो स्पेनिस टोलीको सबैभन्दा ठूलो शक्ति भनेको सामूहिक खेल र मानसिक दृढता हो । खेलाडीहरू साँच्चिकै एउटा टोलीका रूपमा खेल्छन् । उनीहरूको आफ्नै स्पष्ट पहिचान छ र त्यसप्रति उनीहरू पूर्ण रूपमा विश्वस्त छन् । त्यसैले हरेक खेलमा उनीहरू आफ्नै शैलीमा खेल्छन् ।

स्पेनको सबैभन्दा ठूलो शक्ति

विश्वकपमा स्पेनकोे पहिलो खेल केप भर्डेविरुद्ध बराबरीमा टुंगिएको थियो । त्यो नतिजा अपेक्षाअनुसार थिएन । तर टोली आत्तिएन र आफ्नो खेल्ने शैली पनि परिवर्तन गरेन ।

नकआउट चरणमा पोर्चुगल र बेल्जियमविरुद्ध पनि यही कुरा देखियो । जितको गोल गर्न अन्तिम मिनेटसम्म संघर्ष गर्नुपरे पनि टोलीले धैर्य गुमाएन ।

सेमिफाइनलमा फ्रान्सविरुद्ध सुरुआती अग्रता लिएपछि पनि टोलीको सोचमा कुनै परिवर्तन आएन । फ्रान्स प्रतियोगिताको उपाधि दाबेदार टोली थियो र अघिल्ला खेलहरूमा धेरै गोल पनि गरिसकेको थियो ।

यति हुँदाहुँदै पनि स्पेनले केवल अग्रता जोगाउने सोच बनाएन । टोली सकारात्मक रूपमा आफ्नै शैलीमा खेलिरह्यो । आफ्नो पहिचान कायम राख्नु र त्यसप्रति अडिग रहनु नै यो टोलीको सबैभन्दा ठूलो शक्ति हो, विशेषगरी अहिले फाइनलअघि । स्पेनले केही खेलाडी परिवर्तन गर्न सक्छ, तर आफ्नो रणनीति र फुटबल दर्शन परिवर्तन गर्दैन ।

टोलीको लक्ष्य सधैं बल आफ्नो नियन्त्रणमा राख्ने र खेलमाथि सकेसम्म नियन्त्रण कायम गर्ने हुन्छ । पक्कै पनि हरेक खेलको परिस्थिति फरक हुन्छ । तर यस विश्वकपमा अहिलेसम्म खेलेका सातै खेलमा स्पेन कुनै पनि समयमा पछि परेको छैन । यो आफैंमा निकै विशेष उपलब्धि हो ।

यदि फाइनलमा अर्जेन्टिनाविरुद्ध स्पेन पछि पर्‍यो भने पनि सोच बदलिने छैन । स्पेन सुरुदेखि अन्तिमसम्म यही धैर्य र आत्मविश्वासका साथ खेल्दै आएको छ । जसले प्रतियोगिताभर हाम्रो पहिचान बनाएको छ ।

स्पेनमा सबैजना फाइनललाई लिएर आत्मविश्वासी छन्, तर अर्जेन्टिना पनि त्यत्तिकै विश्वस्त हुनेछ । आखिर उनीहरू वर्तमान विश्व च्याम्पियन हुन् र यस प्रतियोगितामा पनि उपाधि रक्षा गर्न सक्ने प्रदर्शन गरेका छन् । यो निकै कठिन प्रतिस्पर्धा हुनेछ, विशेषगरी लियोनल मेस्सी उत्कृष्ट लयमा रहेकाले ।

उनले प्रतियोगिताभर आफ्नो जुझारुपन र जित्ने भोक स्पष्ट रूपमा देखाएका छन् । स्पेनलाई राम्रोसँग थाहा छ कि मेस्सीले खेलको कुनै पनि क्षणमा नतिजा बदल्न सक्छन् ।

इङ्ग्ल्यान्डविरुद्ध उनले आफ्नो पोजिसन परिवर्तन गर्दै दायाँतर्फ बढी खेल्ने ठाउँ बनाए र त्यहीँबाट खेललाई प्रभाव पारे । तर स्पेनले मेस्सी मात्र होइन, अर्जेन्टिनाका अन्य खेलाडीहरूलाई पनि राम्रोसँग चिन्छ ।

यो टोली कति खतरनाक छ र ट्रफी जित्न कति हदसम्म संघर्ष गर्न सक्छ भन्ने कुरा स्पेनलाई राम्रोसँग थाहा छ । अर्जेन्टिनाका जुलियन आल्भारेज पूर्ण खेलाडी हुन् । उनी केवल परम्परागत नम्बर–९ स्ट्राइकर मात्र होइनन्, न त पछाडि झरेर खेल निर्माण गर्ने नम्बर–१० मात्र हुन् ।

उनी विङमा पनि खेल्न सक्छन् र मैदानका हरेक क्षेत्रमा सक्रिय रहन रुचाउँछन् । धेरैपटक उनी पछाडि झरेर खेल जोड्छन्, तर गोल गर्ने अवसर आउँदा उत्कृष्ट फिनिसर साबित हुन्छन् ।

उनी मैदानको जुनसुकै स्थानमा भए पनि अन्तिम लक्ष्य पेनाल्टी बक्समा पुगेर टोलीका लागि गोल गर्नु नै हुन्छ । आल्भारेजले बक्सबाहिरबाट दायाँ र बायाँ दुवै खुट्टाले उत्कृष्ट प्रहार गर्न सक्छन् । क्लब र राष्ट्रिय टोली दुवैका लागि उनले धेरै उत्कृष्ट गोल गरेका छन् ।

उनी लगातार दौडिरहन्छन्, खाली ठाउँ खोजिरहन्छन् र टोलीका लागि निरन्तर मेहनत गरिरहने भएकाले उनलाई नियन्त्रणमा राख्न निकै कठिन हुन्छ । उनीलाई कहिले बल होल्ड गर्ने, कहिले छिटो पास दिने र कहिले वन–टु खेल्दै आक्रमण अघि बढाउने भन्ने राम्रो ज्ञान छ ।

मेस्सीजस्तै आल्भारेज पनि कुनै पनि क्षण खेलको नतिजा बदल्न सक्ने खेलाडी हुन् । उनीसँग प्रतिभा, प्राविधिक क्षमता र खेल बुझ्ने असाधारण क्षमता छ । त्यसैले फाइनलमा स्पेनले उनीमाथि विशेष निगरानी राख्नुपर्नेछ ।

टोली सबैभन्दा माथि

अर्जेन्टिनालाई गोल गर्नबाट रोक्नु सजिलो हुने छैन । तर स्पेनको सबैभन्दा ठूलो शक्ति भनेको उसको उत्कृष्ट टोली संरचना र सुदृढ रक्षात्मक संगठन हो ।

यही कारणले यस विश्वकपमा टोलीले अहिलेसम्म केवल एक गोल मात्र व्यहोरेको छ । स्पेन सामान्यतया विपक्षीको आधा क्षेत्रमा खेल्न र उच्च प्रेसिङ गर्न रुचाउँछ ।

तर जब परिस्थितिले टोलीलाई पछाडि हटेर सघन रक्षात्मक संरचना (मिड वा लो ब्लक) मा खेल्न बाध्य बनायो, त्यसबेला पनि टोलीले प्रभावकारी प्रदर्शन गर्‍यो । यो सम्पूर्ण टोलीको सामूहिक प्रयासको परिणाम हो ।

हरेक खेलाडीले रक्षात्मक जिम्मेवारी उत्कृष्ट रूपमा निर्वाह गरेका छन् । रोड्री र फाबियान रुइजले ब्याक–फोरअघि सुरक्षाकवच बनेर विपक्षीको आक्रमण विफल पार्छन् । तर केवल मिडफिल्डरहरू मात्र होइनन् ।

फ्रान्सविरुद्ध लामिन यामालले पनि रक्षात्मक भूमिकामा उल्लेखनीय योगदान दिएका थिए । उनको अथक मेहनतका कारण फ्रान्सले धेरै स्पष्ट गोल अवसर सिर्जना गर्न सकेन ।

अर्कोतर्फ बायाँ विङमा एलेक्स बाएनाले पनि उत्तिकै प्रतिबद्धताका साथ रक्षात्मक जिम्मेवारी निभाए । लामिन यामालको खेल प्रतियोगितासँगै झन् परिपक्व बन्दै गएको छ ।

बल आफ्नो नियन्त्रणमा नभएको बेला पनि उनले गर्ने मेहनतले उनको सोच र मानसिकता स्पष्ट देखाउँछ । यही यो स्पेनिस टोलीको सबैभन्दा ठूलो शक्तिमध्ये एक हो । उनको योगदान अझै गोलमा धेरै देखिएको छैन । उनले समूह चरणमा साउदी अरेबियाविरुद्ध ४–० को जितमा एक गोल गरेका थिए ।

टोलीका नम्बर–९ मिकेल ओयारजाबाल पनि आवश्यक पर्दा पछाडि झरेर विपक्षी मिडफिल्डरमाथि दबाब सिर्जना गर्छन् र रक्षात्मक जिम्मेवारी निर्वाह गर्छन् ।

यस्तै, फुल–ब्याक पेड्रो पोरो र मार्क कुकुरेलाले केवल रक्षामै होइन, आक्रमणमा पनि महत्वपूर्ण भूमिका खेल्छन् । स्पेनजस्तो आक्रामक टोलीमा फुल–ब्याकहरू धेरै माथिसम्म जान्छन्, जसका कारण उनीहरूको पछाडिको ठाउँ खुला हुन्छ ।

तर पोरो र कुकुरेलाले मैदानका दुवै छेउमा आफ्नो जिम्मेवारी उत्कृष्ट रूपमा निर्वाह गर्न सक्ने क्षमता देखाएका छन् ।

सबैभन्दा सकारात्मक कुरा के भने टोलीका हरेक खेलाडी अतिरिक्त मेहनत गर्न सधैं तयार छन् । फाइनलमा पनि स्पेन यही सामूहिक भावना र खेल दोहोर्‍याउन चाहन्छ । प्रतियोगिताको सुरुआतमा टोलीका केही खेलाडी पूर्ण फिट अवस्थामा थिएनन् ।

अर्जेन्टिनाविरुद्धको फाइनल सजिलो हुने छैन । तर स्पेन सम्भवतः यस विश्वकपकै उत्कृष्ट लयमा फाइनल खेल्न मैदान उत्रँदै छ । र कुनै पनि टोलीका लागि त्योभन्दा उपयुक्त समय अरू हुन सक्दैन ।