काठमाण्डु – भोटेकोशी बाढीबाट प्रभावित क्षेत्रमा नेपाली सेनाले हवाई, खोज तथा उद्धारलाई निरन्तरता दिएको छ ।

सेनाले शुक्रबार मात्रै विभिन्न प्रभावित क्षेत्रबाट ३० जनाको हवाई उद्धार गरेको छ ।

नेपाली सेनाका अनुसार भदौ २६ गते साँझ ५:३० बजेसम्म हवाई साधनमार्फत ४ हजार १३७ जनाको उद्धार गरिएको छ । उद्धार गरिएकामध्ये ३ हजार ८५४ नेपाली र २८३ जना विदेशी नागरिक रहेका छन् ।

बाढीबाट प्रभावित जलविद्युत् आयोजनाका टनेलमा समेत खोज तथा उद्धार कार्यलाई तीव्र पारिएको सेनाले जनाएको छ ।

रसुवागढी जलविद्युत् आयोजनामा कम्पोजिट क्विक रियाक्सन टीम तथा विदेशी नागरिक सहितको संयुक्त खोज तथा उद्धार टोलीले खोजी गरिरहेको छ ।

लाङटाङ हाइड्रोमा नेपाली सेनाको टोलीले टनेलभित्र खोजी कार्य जारी राखेको छ । चिलिमे हाइड्रोमा विदेशी नागरिक सहितको संयुक्त टोलीले टनेलभित्रको लेदो हटाउने काम गरिरहेको छ । भारी उपकरण टनेलसम्म लैजान पहुँचमार्ग निर्माण सम्पन्न भएपछि थप खोजी कार्यलाई तीव्र पारिएको सेनाले जनाएको छ ।

माथिल्लो त्रिशूली–१ अन्तर्गत हाकुबेशीस्थित अडिट–१ टनेलको करिब २०० मिटर आसपास ड्रोनमार्फत रेकी गरी खोजी गरिएको छ । उक्त क्रममा हालसम्म केही फेला नपरेको जनाइएको छ ।

त्रिशूली–३ ए को पावरहाउस तथा टनेल क्षेत्रमा संयुक्त टोलीले खोजी गरिरहेको छ । त्रिशूली–३ बी मा पनि संयुक्त टोली परिचालन गरी खोजी कार्य जारी राखिएको छ ।

प्रभावित क्षेत्रमा पैदल गस्ती

सेनाले रसुवा र नुवाकोटका त्रिशूलीपारि कोलोनी, तुप्चे, दानसिङ, सामरी भञ्ज्याङलगायत विभिन्न स्थानमा पैदल गस्ती गरी खोजी गरिरहेको छ ।

स्याफ्रुबेसीस्थित होल्डिङ सेन्टरमा बाढी प्रभावितका लागि सञ्चालन गरिएको स्वास्थ्य शिविरबाट शुक्रबार ५४ जनाले स्वास्थ्य सेवा लिएका छन् । त्रिशूली र धुन्चेमा नेपाली सेनाले स्थापना गरेको आपतकालीन उपचार केन्द्र तथा मेडिकल पेट्रोलबाट शुक्रबार ८५ जनाले स्वास्थ्य सेवा प्राप्त गरेका छन् । यी सेवाबाट हालसम्म ३ हजार ६६५ जनाले स्वास्थ्य सेवा प्राप्त गरिसकेको सेनाले जनाएको छ ।

रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म ८ हजार ७ सयभन्दा बढी सैनिक प्रत्यक्ष रूपमा परिचालित छन् । उनीहरूले घाइतेको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालन र आपतकालीन उपचार लगायतका कार्य गरिरहेका छन् ।