बारपाक– उर्जा, जलश्रोत तथा सिंचाई मन्त्री वर्षमान पुनले २०७२ साल बैशाख १२ गतेको भुकम्पको केन्द्रबिन्दु लाप्राक र बारपाकमा भईसकेको पुननिमार्णको अवस्थाको अनुगमन गरेका छन् । महाभुकम्प गएको ३ वर्ष पुगेको सन्दर्भमा लाप्राक र बारपाकको भुकम्प पछिको पुनःनिमार्ण र ज्यान गुमाएकाहरुको संझनामा आयोजित श्रदाञ्जली कार्यक्रममा सहभागि हुन मन्त्री पुन बुधबार बिहान गोरखा गएका हुन् ।

गोरखाका प्रमुख जिल्ला अधिकारी जितेन्द्र बस्नेत तथा स्थानीय नेताका साथ लाप्राक र बारपाक पुगेका नेता पुनले सरकारी, निजी तथा गैर आवासीय नेपाली संघ (एनआरएनए)ले गरिरहेको पुनःनिमार्णमा सरकारले पुरै साथ दिने बताए । पुननिमार्णको काम केन्द्रीकृत ढंगबाट हुन नसकेको गुनासो स्थानीय जनताबाट आएको बताउदै मन्त्री पुनले विकेन्द्रीत भएका कामहरुलाई एकिकृत र व्यवस्थीत बनाउन सरकार र पुननिमार्ण प्राधिकरण लागि पर्ने बताए ।

‘नयाँ संविधान अनुसार ३ तहको सरकारले काम गरिरहेको छ । राजनीतिक संक्रमण अन्त्य भएपनि प्रशासनिक संक्रमण बाँकी छ ।’ उनले भने, ‘यसो भनेर सरकार पन्छन खोजेको होईन । पुननिमार्ण र भोलीका दिनमा आईपर्ने यस्ता खालका प्राकृतिक विपत्तीको समेत सामना गर्न सरकार सक्षम हुने गरि अघि बढ्छ ।’

गोरखा जिल्ला र लाप्राक तथा बारपाकमा ७७ प्रतिसत काम सम्पन्न भईसकेको प्रमुख जिल्ला अधिकारीले जितेन्द्र बस्नेतले जानकारी दिए । पार्टी एकताको काम समेत छिट्टै निचोडमा पुग्ने नेता पुनको भनाई छ । ‘९ गते नै एकता घोषणा गर्न खोजेको हो, गर्न खोजेको जस्तो भएन, उनले भने, ‘नेताहरुले छलफल गरिरहनु भएको छ । छिट्टै टुंगोमा पुग्छ ।’