काठमाण्डु- ६१ किलो सुन तस्करी प्रकरणमा फरार रहेकी माओवादी नेतृ अमला रोक्का पक्राउ परेकी छिन्।

शुक्रबार केन्द्रीय अनुसन्धान ब्युरो (सीआईबी)को टोलीले काठमाण्डुको टोखाबाट पक्राउ गरेको हो ।

सीआईबीका प्रमुख (एआइजी) चन्द्र कुवेर खापुङले शुक्रबार अपराह्न अमलालाई पक्राउ गरिएको काठमाण्डुपाटीलाई बताए ।

अमला सुन तस्करीमै पक्राउ परेका बेल्जियमका नागरिक दावा छिरिङकी श्रीमती हुन्।

उनी माओवादीको रोल्पाकाठमाण्डु सम्पर्क मञ्चकी पूर्वउपाध्यक्षसमेत हुन्।

 २०८० साउन २ गते त्रिभुवन अन्तर्राष्ट्रिय विमानस्थल भन्सार कार्यालयबाट छुटेको ब्रेक-शुमा सुन रहेको सूचनापछि राजस्व अनुसन्धान विभागले नियन्त्रणमा लिएको थियो।  

भन्सार जाँच भइसकेर छुटेको ब्रेकशुलाई नियन्त्रणमा लिँदा ६० किलो ७१६ ग्राम सुन भेटिएको थियो। तत्कालीन अवस्थामा दिलिप भुजेलको नाममा दर्ता भएको रेडी ट्रेड प्रालिले ब्रेकशु मगाएको अनुसन्धानमा खुलेको थियो। 

दावालाई राजश्व अनुसन्धान विभागको टोलीले २०८० साउन १४ गते पक्राउ गरेको थियो। तर अमला फरार थिइन्।