सिरियाली गुटा क्षेत्रबाट एक लाख सर्वसाधारण विस्थापित
दमास्कस– सिरियाली विपक्षी दलको प्रभाव रहेको पूर्वी गुटा क्षेत्रबाट एक लाखभन्दा बढी सर्वसाधारण द्वन्द्वको भुमरीबाट बच्नकै लागि विस्थापित हुनुपरेको सिरियाली राज्य सञ्चालित साना न्यूज एजेन्सीले जनाएको छ ।
विद्रोहीको राम्रो आधारस्थलका रूपमा चिनिने गुटा क्षेत्रमा सरकारी फौजले विगत एक महिनायता चलाएको कारवाहीपछि ठूलो संख्यामा सर्वसाधारण पलायन भई सुरक्षितस्थलतर्फ गएको सिरियाली सेनालाई उद्धृत गर्दै सानाले जनाएको हो ।
“पूर्वी गुटामा सरकारी फौजले आक्रामक रूपमा विद्रोहीविरुद्ध उत्रेपछि द्वन्द्वमा आफूहरू पनि पर्ने डरमा एक लाख पाँच हजार मानिसले गुटा नजिकका सरकार नियन्त्रित क्षेत्रमा शरण लिन पुगेका छन्, तर यसबारे थप जानकारी भने सेनाले दिएको छैन,” सानाले आफ्नो समाचारमा बताएको छ ।
सिरियाली राज्य सञ्चालित टेलिभिजनले पनि करीब चार लाख जनसंख्या रहेको गुटाकाट विस्थापितको यति नै संख्या रहेको समाचार प्रसारण गरेको छ । विस्थापित सबैजना सिरियाली सेनाले मानवीय सहयोगका लागि खुला गरेको बाटोे प्रयोग गर्दै गुटाबाट बाहिरिएका विभिन्न सरकारी सञ्चारमाध्यमले जनाएका छन् ।
रासस/एएफ्पी
